eqqakkat
Kapisilinni eqqakkat immikkoortiterneqartalissapput
Nunaqarfimmi innuttaasut soqutiginnilluarput Kommuneqarfik Sermersuumi Ingerlatsinermut Avatangiisinullu immikkoortoqarfik pingasunngormat maajip 11-anni nunaqarfimmi Kapisilinni paasissutissiilluni ataatsimiititsimmat
Igalaamernit, savimernit, eqqagassat ulorianartut kiisalu eqqagassat nalinginnaasut siunisami nunaqarfimmi Kapsilinni immikkoortiterneqartalissapput, eqqagassat containerimut, nunaqarfiup qeqqaniittumut iginneqannginneranni.
Innuttaasut soqutiginnilluarput Kommuneqarfik Sermersooq pingasunngormat paasissutissiilluni ataatsimiititsimmat, qanoq isilluni eqqagassat immikkoortiterneqartassanersut.
Eqqagassalerineq
– Nuanneqaaq tusarlugu nunaqarfimmi alianaatsumi Kapisilinni pinngortitap avatangiisillu saligaatsuutinnissaannik innuttaasut soqutiginninnerujussuat, eqqagassalerinermik iisimasaqarfimmipisortaq Margrethe R. Hegelund saqqummiussinerup kingorna oqarpoq.
Eqqakkat immikkoortiterneqartalissapput nunaqarfiup ikuallaasarfiata marsimi matunerata kingorna.
Avatangiisinut iluaqutaassaaq
2012-imiilli Kommuneqarfik Sermersooq kommunimi najugaqarfinnut eqqakkanut najoqqutassamik ineriartortitsisimavoq. Najoqqutassarlu taannarpiaq najugaqarfinnut tamanut ullumikkut sapinngisamik pitsaanerpaamik ineriartortinneqarlunilu naleqqussarneqarpoq.
Eqqakkat immikkoortiterneqartarnerisa saniatigut aamma soqutigineqarluarpoq nunaqarfimmi avatangiisit takujuminarnerulernissaat, tassa suli eqqagarpassuaqarmat - pingaartumik aalisarnermut atortunik, snescooterinik angallatinillu, piffiup ingerlanerani nunaqarfiup eqqaanut iginneqartarsimasunik.