Kanukokap siulittaasuaq iluarisimaartoq: Qinersiartortartut amerlipput

Kommunalbestyrelsimut nunaqarfinnullu aqutsisunut qinersineq naammassisimalerpoq.

KANUKOKA-p siulittaasuata Simon Simonsenip, marlunngormat kommuninut qinersisoqarnerani qinersiartorluartoqarsimanera nuannaarutigaa.

- Siullermik qinigaaffiup siuliani kommunini innuttaasut oqartussaaqataanerata kinguariartulersimagaluarnera maanna pakkersimaarneqarmat KANUKOKA-mit nuannaarutigaarput, tusagassiuutinut nalunaarummini oqarpoq.

Suliffiit nuunneqarnissaat

Qinersisartut taasinermikkut oqariartuutigaat nukiit nutaat, ilaatigullu kinguaariit nutaat, piffissanngortoq aquummik tigusinissaat, Simon Simonsen oqarpoq.

- Inuusuttut arnallu amerlanerusut angusarissaarnerat aamma nuannaarutigaarput.

- Qinersinerup inernera KANUKOKA-mut isumalerujussuuvoq. Kommunit amerlisussaaginnaratik aammattaaq kommunit partiinit annerusunit marlunnit aqunneqalerneratigut paaseqatigiilluarnissap suleqatigiilluarnissallu pisariaqassusia tamanut ersarissisoq nuannaarutigaarput, Simon Simonsen oqarpoq.

Kanukoka-llu qinigaaffimmi maanna aallartittumi kommunit nammineersinnaanerannik tunngavissat pitsaanerpaat sulissutigittuinnarnissaat nangissavarput.

- Tassungalu atatillugu qilanaarivarput pisortat suliassaqarfiisa amerlanerusut kommuninit tiguneqarnissaannut suliniutit sukkatsinneqarnissaat, kiisalu Namminersorlutik Oqartussat suliffeqarfiutaasa ilaannik sinerissamut siammarterinissap aallartisarluarneqarnissaa, Simon Simonsen oqarpoq.