Kanukokami siulittaasuusimasoq: Kommunit periarfissinneqarlik
Inatsisartunut kommunalbestyrelsinullu ullormi ataatsimi qinersineq kommuninut aaqqissuusseqqinnissap piviusumik imaqarnissaanut periarfissamik nutaamik pilersitsivoq.
Nassuerutigaarput: Kommunit aaqqissuuteqqinneqarnerat isornartorsiorneqaleruttormat, qulequtaq maajimi 2014-imi allaaserisamit saqqummersitatsinnit atoqqitaavoq.
Siumumeersoq Martha Abelsen 2010-15-imi kommunit kattuffianni Kanukokami siulittaasuuvoq, januaarip aallaqqaataani 2009-imi kommunerujussuit pilersinneqarnerisa kingorna ukiut tallimaannaat qaangiuttut, »Namminersornerullutik Oqartussat eqqunneqarnerannit allaffissornikkut aaqqissuusseqqinnerit annersaat« inerniliullugu nalilerneqarnissaa taassuma siusigaa.
– Kommunit periarfissinneqarlik, Martha Abelsen Sermitsiamut oqarpoq.
Maanna apriilip arfernanni marlunngornermi qinersinissamut Inatsisartunut kommunalbestyrelsinullu qineqqusaarnermi, kommuninnut aaqqissuusseqqinnerup atorunnaarsinneqarnissaa, aamma kommunerujussuit atorunnaarsinneqarnissaa, kommunillu 18-iusimasut atuutileqqinnissaat partiit arlallit piumasaraat.
Martha Abelsen Kommuneqarfik Sermersuumi kommuninut qinersinermi qinigassanngortittoq, 2014-imi kaammattuutigisani suli attappaa:
– Kommunit periarfissinneqarlik, ullumi Sermitsiamut taama oqarpoq.
Martha Abelsenip periarfisseeqqinnissamik oqarnermini, kommunerujussuit inerniliussamik nalilerneqannginnerini, kommunit aaqqissuuteqqinneqarneranut piumasaqaatit naammasseqqaarneqarnissaanik isumaqarpoq.
Allaaserineqartoq aviisimi Sermitsiami tamakkiisumik atuaruk. Aviisi uani pisiarineqarsinnaavoq: