Kommuunit
Kanukokami siulersuisut inissitsiterput
Kommuunit kattuffianni Kanukokami siulersuisut, aallartitat immikkut ataatsimeereernerisa kingorna, siulittaasup tullianik siullermik aappaanillu qinersipput
Marsip 19-iani aallartitat immikkut ittumik ataatsimiinnerata kingorna, ilaatigut Siumumeersup Martha Abelsenip Siumukkormioqatiminit Palle Jerimiassenimit siulittaasutut taarserneqarneranik kinguneqartumi, siulersuisunngortut marlunngornermi inissitsiterput siulittaasup tullianik siullermik aappaanillu toqqaallutik.
Siumumeersoq Ole Mølgaard-Motzfeldt, Kommune Kujallermi qinigaq, siulittaasup tulliatut siullertut qinerneqarpoq, Inuit Ataqatigiinneersoq Kelly Berthelsenilu, aamma Kommune Kujallermi qinigaq, siulittaasup tulliata aappaatut qinigaasoq.
Atuaruk: Kanukoka nutaami siulittaasortaarpoq
Kanukokap siunissami ilusissaa
Siulersuisut marlunngornermi ataatsimiinneranni oqaluuserisaq pingaarneq tassaavoq Kanukoka siunissami qanoq iluseqassanersoq. Kattuffiup politikkikkut aqunneqarnerani ilusissaq pillugu siunnersuutinik piareersaasoqarsimavoq.
- Taakkulu kommunalbestyrelsinut maanna ingerlateqqinneqassapput upernaap ingerlanerani isummerfigisassanngorlugit, Kanukokamit taama nalunaaruteqarput.
Pilersaarutaavoq Kanukokap siunissami ilusissaa aallartitat isumasioqatigiinnissaanni juunip aallartisimalernerani sukumiisumik oqallisigineqassasoq. Taavalu Kanukokap nutaap 1. januaari 2016-imit malittarisassariligassaasa 2015-imi ukiakkut aallartitat immikkut ittumik ataatsimiiseqqinneqarnissaanni aalajangersarneqarumaarnissaat siunneqarpoq.
Atuaruk: Kanukokamut ilaasortaaginnarnissamut siunnersuut suliassanngortippoq