Kanukoka: Angallannermi malunnartumik ajornerulersitsisoqarpoq

Kommune Kujallermi kommunalbestyrelsimut ilaasortat marlunngornermi Disko Linemut sakkortuumik isornartorsiuipput.

- Angallassinermut isumaqatigiissutip atuutilerneraniit pissutsit pitsaangilluinnartut atuutilerput. Umiarsuaateqarfimmi sulisut paasissutissiisarnerat naammaginanngilaq, tamannalu akuersaarsinnaanngilarput, kommunimi qinikkat erseqqissaapput, Narsami kommunimi politikerit ilaatigut taama oqarput.

Atuaruk: Kommunimi politikerit Disko Line isornartorsioraat

Ernummtigineqartoq piviusunngortoq
Kanukokap umiarsuaateqarfik aamma maanna isornartorsiorpaa.

Nuna tamakkerlugu kommunit kattuffiata siulittaasuata Simon Simonsenip Naalakkersuisut aamma Disko Line isornartorsiorpai.

- Maanna takusinnaalerparput kujataani innuttaasugut qinikkallu ernummatigisarput tassa atuutilersoq, Simon Simonsen allappoq.

Nangipporlu:

- Tassalu kujataani innuttaasugut angallassinikkut sullinneqarnerput assut ajorseriarujussuartoq aammalu sullissisussatut toqqarneqartut suliassaminnut piareersimanngilluinnartut, soorlulusooq piareersarsimanngiivissutut isikkoqartut aamma akisussaafigilikkaminnut sumiginnaarpalaartutut pissusilersortut.

Simonsen: Pisut paasineqarlik
Angallanermi ajornerulertoqannginnissaa naalakkersuisunut ilaasortap Martha Lund Olsenip (S) siornatigut neriorsuutigereerpaa.

- Kisiannili taammaappa? Naamerluinnaq!, Simon Simonsen oqarpoq.

Disko Line A/S, Air Greenland kiisalu Mittarfeqarfiit innuttaasunik sullissinerminni suliartik pimoorutissagaat, taassuma neriuutigaa.

- Neriuutigalugu Naalakkersuisut tamarmiullutik pineqartut uku malinnaafigeqqissaasagaat nakkutigeqqissaarlugillu pisussaafimmissut akisussaafimmissullu isigalugit ilami inuiaqatigiinni akileraartartorpassuit aningaasalersugaraat minnerpaamillu pitsaasumik sullinneqarnermik inerneqarniartussat.

- Naalakkersuisut ilungersoqaagut tusaasigut, Simon Simonsen oqarpoq.