KANUAANA-p nalunaarummik nutaamik isornartorsiuineq isumaqatiginngilaa

Kalaallit Nunaanni Aalisarsinnaanermut Akuersissutinik Nakkutilliisoqarfiup (KANUAANA) aalisarnermi nakkutilliineq pillugu nalunaarutip nutaap Sulisitsisunit sakkortuumik isornartorsiorneqarnera isumaqatiginngilaa. Nutaartaqanngilaq, Tunngaviusumillu Inatsimmik unioqqutitsinngitsoq oqaatigineqarpoq.

Aalisarnermi nakkutilliineq pillugu nalunaarusiaq nutaaq, Namminersorlutik Oqartussat juunip 22-anni nalunaarutigisaa Sulisitsisut sakkortuumik isornartorsiorpaat. Nalunaarut 1. aggusti atulissaaq. Isornartorsiutigineqartut ilaat tassaavoq, nalunaarusiap tunngaviusumik inatsimmik unioqqutitsisinnaanera, tamannali KANUAANA-p ilumuunnginnerarpaa.

- Nalunaarummi tunngaviusumik inatsimmut unioqqutitsisunik inatsiseqanngilaq. KANUAANA-p tusarniaanermut akissutit assigiinngitsut Kammeradvokatimut Namminersorlutillu Oqartussat inatsisilerituuinut saqqummiunneqarput, taakku nangaassutigineqartut ersarissumik tunngavissaqannginnerarpaat, nalunaarullu Tunngaviusumik inatsimmut naapertuunnerarlugu, aalisarnermik nakkutilliisoq Michael D. Pedersen Sermitsiaq.AG-mut oqarpoq.

Danskit aalisarsinnaanermik nakkutilliinerat KANUAANA-mit annertunerusunik piginnaatinneqartoq Michael D. Pedersenip oqaatigaa, tamannalu Tunngaviusumik inatsimmik unioqqutitsisutut nalilerneqarsimanngisaannartoq.

Arsaarinninneq pillugu inatsit

Pinerluttulerinermi inatsisit §§ 166 – 170, eqqartuussivimmit arsaarinnittoqassanersoq nalilerneqaraangat malinneqartussat.

Piginnaatitaanerit siornatigutut ittut
Nalunaarummi nutaami arsaarinnissinnaanermut piginnaatitaanerit allanngortinneqarsimanngitsut, taanna isumaqarpoq.

- Piginnaatitaaffiit taakku aalisarnermut inatsimmeereerput, siornatigullu taamatut oqallisigineqarnikuunatik, taanna oqarpoq.

Nalunaarummi nutaami kukkunersiuisoqarpoq, nalunaarutillu pingasut ataatsimut kattunneqarlutik, EF-imullu uppernarsaasiisarnermut ersarissumik tunngaviliisoqarpoq.

Pisat umiarsuarmiittut unioqqutitsilluni aalisarnermik inatsimmik unioqqutitsisut, EF-imut uppernarsaaserneqarsinnaannginnerinik tamanna isumaqarpoq. Pisanulli unioqqutitsilluni pisarineqarsimasunut kisimi atuuppoq. Pisat unioqqutitsinani pisat akerlianik immikkut pisanut uppernarsaammik atuutilersinneqarsinnaapput, tamatumalu saniatigut EF-imut uppernarsaaserneqarsinnaallutik.

Unioqqutitsilluni pisat EU-mut, Danmarki ilanngullugu tunineqarsinnaannginneranik kinguneqartarpoq. Kisianni pisat unioqqutitsinngitsut akerlianik atuutilersinneqarsinnaapput, taamaattumillu uppernarsaaserneqarlutik avammullu tunineqarlutik.

Eqqartuussivinnit aalajangerneqartartut
Arsaarinninnermut suliani KANUAANA aalajangiisassanngitsoq, Michael D. Pedersen naqissusiivoq.

- Arsaarinnittoqassanersoq eqqartuussisoq kisimi aalajangiisinnaavoq, taanna oqarpoq.

Taamaattorli KANUAANA sulianik aallartitsisoqassanersoq aalajangiisarpoq, inatsimmik atuisitsisuugamik. Inatsimmik unioqqutitsisoqarneranik naliliigunik, KANUAANA suliamik aallartitsisarpoq, taannalu unnerluussisussaatitaasunut nassiuttarpaat, kingornalu tunngavissaqarpat suliaq eqqartuussivimmut ingerlateqqittarpaat.

Taava pisanik arsaarinnittoqassanersoq eqqartuussisup nalilissavaa, imaluunniit pigisanik nalilinnik arsaarinnittoqassanersoq. Taakku marluk pisat EF-imut uppernarsaaserneqarsinnaannginnerannik isumaqarput, taamaalillutillu Danmarkimut EU-mullu tunineqarsinnaanatik.

Nakkutilliineq eqqarsaatigilluagaassaaq
Sulisitsisut nalunaarut pisariaqanngitsumik inatsisilersuisoqarnerarlugu isornartorsiuivoq, taakku oqarnerat naapertorlugu suliassaqarfimmi unioqqutitsisarnerit amerlanngimmata.

- Innuttaasut inatsisinik malinnitsikkusullugit inatsisiliortoqartarpoq. Innuttaasut inatsisinik malinnippata, taava ajunngilluinnarpoq, Michael D. Pedersen oqarpoq.

KANUAANA-p kisitsisaatai naapertorlugit 2020-mi aalisarnermi pisanik arsaarinnissuteqarnermik suliaqartoqarsimanngilaq. Taamaattorli unioqqutitsilluni umimmannik pisaqartoqarneranik suliat pingasuusimapput aamma mannissartoqarsimalluni, taakku arsaarinninnermik kinguneqarput.

- Aalisarneq atajuartuussaaq, aalisakkallu pisuussutit kalaallit inuiaqatigiit pigigaat puigussanngilarput, tamannalu siunissami kinguaariit amerlasuut iluaqutigisinnaasariaqarpaat, taamaammallu aalisarnermik nakkutilliineq eqqarsaatigilluagaassaaq, KANUAANA-mi aalisarnermik nakkutilliisoq Michael D. Pedersen oqarpoq.

Powered by Labrador CMS