Skip to main content

KANUAANA misissorneqassasoq

Kalaallit Nunaanni Aalisarsinnaanermut Akuersissutinik Nakkutilliisoqarfik ingasappallaarpoq, nakkutilliinerat siunertamut naapertuutinngilaq. Taamatut isumaqarput sulisitsisut, nakkutilliisut suleriaasiannik misissuititserusuttut.

Kalaallit Nunaanni Sulisitsisut pisortaat aalisarnermik nakkutilliisarneq pillugu nalunaarummut nutaamut, oktobarip aappaata tungaanut tusarniaassutigineqarsimasumut isornartorsiuisorpassuit ilagaat.

Sulisitsisut Kalaallit Nunaanni Aalisarsinnaanermut Akuersissutinik Nakkutilliisoqarfimmut (KANUAANA) pingaarnertut oqariartuutigaat: Unioqqutitsilluni aalisartoqannginnersoq misissuiffiginiarlugu nakkutilliinermi periarfissaareersut atorsigit, tassa ilimagisat naapertorlugit naatsorsueriaatsillu atorsinnaanngitsut atornagit umiarsuiat tunitsiviillu misissuiffigisigit.

KANUAANA-p aalisakkerivinnit anisut tunngavigalugit aalisakkerivinnut eqqunneqartut naatsorsorniarsarisarpai. Tassa tunisassiat nammassillugit suliarineqareersut aalisakkat uumasut tunngavigalugit naatsorsorniartarpai.

Nakkutilliineq siunertamut naapertuutinngitsoq

Taamatulli naatsorsueriaaseqarnermi misilittakkat takutippaat, tamanna atorsinnaanngitsoq, Sulisitsisut pisortaat oqarpoq.

- Tunisassioriaaseqarpoq assigiinngitsorpassuarnik immersuiffimmi siunertamut naapertuutinngitsumik inerneqartartunik, taamalu nakkutilliinermi ullumikkut periarfissaareersut ajornanngitsut atornagit naatsorsuisoqaraangat kikkut tamarmik asuli sulilussinnartarlutik, Brian Buus Pedersen Sermitsiaq.AG-mut oqarpoq.

Nalunaarutissami nutaami anguniarneqarpoq, nakkutilliinermi periarfissat pineqaatissiissutissalu annertuut atorneqartarnissaat, tamatuma malitsigisaanik aalisakkerivinnut tunisaqartut akisussaaffigilissavaat, aalisartut inatsimmik unioqqutitsillutik aalisarsimannginnerannik nakkutiginninnissaq. Polar Seafoodip KANUAANA aalisarnermik nammineq nakkutilliinani allanut nakkutilliisussanngortitsinera isornartorsiorpaa.

-  Matumani pineqarpoq, nakkutilleeriatsimik suliaqarsimanerat inuit pinerluttartutut tunngaviatigut isigalugit. Tamatuma saniatigut aalisakkeriviit nakkutilliinissamut akisussaaffilerneqassapput, tamatumunnga peqataarusunngilagut, Henrik Leth oqarpoq.

Inuit ilaat ajornannginnersiuisartut

KANUAANA-mi inspektøri Michael Pedersen oqarpoq, nalunaarutissami nutaami nakkutilliisoqarnerulernissaa anguniagaanngitsoq. Ilanngullugu oqaatigaa, taamatut suliaqarnermi aalisarnerup tutsuigineqannginnera pineqanngitsoq.

- Tunngaviatigut isumarput tassaavoq, Kalaallit Nunaanni inatsit malillugu aalisartoqartartoq. Inuilli pineqartillugit, ilaat ajornannginnersiuisartut. Suliffeqarfinni tamani tamanna atuuppoq, taanna oqarpoq.

Brian Buus Pedersen erseqqissaalluni oqarpoq, KANUAANA-p suleriaasiata pitsanngorsarneqarnissaa piffissanngortoq. Tassa allaffissornikkut nutaamik nalunaarusiortoqartariaqanngilaq, aamma malittarisassanik nutaanik suliaqartoqannginnerani minnerpaamik nalilersuisoqaqqaartariaqartoq.

- Nalinginnaasuuvoq suna ajunngitsumik ingerlanersoq sunalu ajortumik ingerlanersoq oqaluuseriniarlugu ingerlatseriaatsimik nalilersuisarneq, Kalaallit Nunaanni Sulisitsisut pisortaat Brian buus Pedersen oqarpoq.

- Suliat eqqortumik suliarineqarnersut oqaluusererusupparput, tassa inatsimmik unioqqutitsilluni aalisartoqannginnissaa anguniarlugu, sunniuteqarluartumilli aalisartoqarnissaa siunertaralugu.

Nakkutilliisoqarpallaartoq

KANUAANA-mik nalilersuiniarnermi siunertarineqarpoq, kikkut tamarmik naammgisinnaasaannik pitsaanerpaamik qanoq nakkutilliiisoqarsinnaanersoq. Pitsaanerpaamik nakkutilliisoqartassappat isumalluutit piginnaasallu eqqortut pigineqartariaqarput, pingaartumillu atuisut paasisinnaasaannik nakkutilleeriaaseqartoqartariaqarluni, Brian Buus Pedersen erseqqissaavoq. 

Taanna oqarpoq, KANUAANA nakkutilleeriaatsimik aalisarnermik ingerlatsisut amerlassusaanut naapertuutinngitsumik ingerlatsisartoq, nalunaarutissarlu nutaaq aqqutigalugu inatsisitigut killissarititaasut qaangerujussuarlugit piumasaqartoqartoq, tassa suliassamut tunngatillugu naapertuutinngilluinnartumik. Michael Pedersenilli tamanna isumaqatiginngilaa.

- Ikittunguuvugut. Ukiumut 56-it nakkutilliisarput, maannalu nakkutilliisussanik amigaateqarluta. Isumaqarpunga ingasattajaartumik nakkutilliisarata, taanna oqarpoq.

Aalisarneq pillugu Ataatsimiititaliarsuup septembarimi ataatsimiittoqarmat Sulisitsisut KANUAANA-mik misissuisoqarnissaanik kissaateqarnerat tapersersimavaa. 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER