Kannguttaatsuliortarsimaneq pillugu suliaq eqqartuussivimmi nanginneqassaaq
KNI-mi pisortaanerusimasumut Peter Grønvold Samuelsenimut atatillugu suliaq marlunngornermi nanginneqassaaq.
Peter Grønvold Samuelsenip kannguttaatsuliortarsimanera pillugu suliaq marlunngornermi Qeqqata Eqqartuussiviani nanginneqassaaq.
Eqqartuussivimmi dommeri Louise Skifte KNR-imut taamatut ilisimatitsivoq.
Suliamut atatillugu aalajangiiniarneq kinguartinneqarsimavoq, ilaatigut kingullermik eqqartuussivimmi suliaqartoqarmat paasissutissanik amerlanerusunik takkuttoqarsimanera pissutigalugu.
Unnerluussisussaatitaasoq Anne Clinton kingullermik martsip 24-ani eqqartuussivimmi suliaqartoqareersoq Sermitsiaq.AG-mut taamatut ilisimatitsissuteqarsimavoq:
- Ullumi ilisimannittut nassuiaateqarneranni suliamut atatillugu paasissutissanik nutaanik pingaarutilinnik saqqummiussisoqarpq, taakku eqqartuussiviup suliami uppernarsaatitut naliliiffiginnginnerani misissoqissaaqqaarneqartariaqarput, unnerluussisussaatitaasoq taamanikkut oqaluttuarpoq.
Ilisimannittoq alla aggersarneqassasoq
Paasissutissat nutaat tunngavigalugit ilisimannittumik allamik aggersaasoqassaaq, ilisimannittullu suliami siusinnerusukkut nassuiaateqarsimasut aggersarneqaqqissinnaallutik.
Illersuisup unnerluussisussaatitaasullu kissaateqarnerisigut ilisimannittumik allamik aggersaasoqassaaq, ilisimannittoq pissutsit ilaannik qulaajaanissamut ikiuutaassaaq.
KNI-mi pisortaanerusimasoq pisortaanerunermini sulisuut arlalinnut kannguttaatsuliortarsimasutut pissutsini tallimani unnerluussaasimavoq.
Unnerluussut naapertorlugu, pisortaanerusimasup piffissami 2016-imi januaarimiit 2021-mi februaarip tungaanut sulisut arnat timaasigut attuualaartarsimavai.
Peter Grønvold Samuelsenip illersuisuata ilisimatitsissutiginikuuaa, pisortaanerusimasoq pisuussuteqannginnerartoq pinngitsuutinneqarnissanilu anguniaraa.