Kannguttaatsuliornerit: - Qinikkat akornanni kultoori peqqinnanngivissoq

Namminersorlutik Oqartussani atorfilittaq qaffasissumik inissisimasoq ukiunilu arlalinni sulisuusoq oqaluttuarpoq, politikerit qinikkat kinguaassiutitigut innarliisarnerat takornartaanngitsoq.

Atorfimmini inissisimanerminiit politikerit pissusilersuutaat ukiorpassuanngortuni malinnaavigisinnaasimavai isumaqarlunilu, politikerit pissusilersuutaat Siumup maanna allattaanerisimasaanut unnerluussutigineqartunut assersuunneqarsinnaasut.

- Politikerit arlallit takusarpakka pingaartumik arnanut inuusuttunut oqaatsitik atorlugit kinguaassiutitigut innimiilliortut. Pissusilersuutaat uanga naliliinittut sakkortoorujussuupput, angut atorfini pillugu kinaassutsiminik isertuussiumasoq oqarpoq.

- Pisortatut suliffiup iluani pissusilersornissamut malittarisassat eqqumaffigivakka, minnerunngitsumik kinguaassiutitigut innimiilliortoqannginnissaanut malittarisassanut tunngatillugu. Politikerilli angutit ilaat ersarilluinnartumik isumaqarput malittarisassat namminneq malittariaqarnagit, arnanullu piumasaminnik pissusilersorsinnaallutik.

Naalakkersuisoq pineqarpoq

Atorfilittap pisut ilaat nassuiarpaa, tassa naalakkersuisup allatsi kinguaassiutitigut ersarilluinnartumik oqaaseqartarluni innimiilliorfigigaa.

- Pisoq nalilissagukku ajornerpaatut sakkortunerpaatullu inissittariaqarpara. Sulisuma ilaat taama oqalussimagaluarpat erngerlunga paatsuugassaanngitsumillu paasitissimassagaluarpara suliffeqarfiup iluani taama pissusilersorneq akuerineqarsinnaanngitsoq.

Arnaq inuusuttoq kingusinnerusukkut oqaluttuarsimasoq taama pissusilersorneq oqaatsillu atorneqartut sungiusimaannarlugit, Siumut partiiata allattoqarfianiittareersimagami.

- Taama pissusilersortariaaseqarneq maajunnarluinnartuusoq isumaqarpunga. Arnat politikkikkut suliaqarusuttut taama misigisaqartariaqarnissaat pissusissamisoortussaanngikkaluarpoq.

Partiit allat aamma taamaapput

Atorfilittap erseqqissarpaa ukiuni arlalinni taama pissusilersortoqartareersoq, taamaaliortullu Siumut tunuliaqutaralugu taamaallaat politikeriuunnanngitsut. Atorfilittaq naapertorlugu partiit allat tunuliaqutaralugit politikeriusut aamma kissaatigineqanngitsumik qaninniartarsimapput imaluunniit kinguaassiutinut tunngasunik oqaasertaliisarsimallutik.

- Ataatsimiititaliani angalanerni politikerit angutit akornanni ersarilluinnartumik unammisoqartarsimavoq kina 'arnarniaqqaassanersoq' unammissutigineqarluni, tamannalu ersarilluinnartumik oqaluuserineqartarsimalluni.

- Qinikkatta ilaasa akornanni kultoorerineqartoq peqqinnanngivissortutut isigaara. Inatsisitsinnut akisussaanerpaajusut taama pissusilersortarnerat akuerineqarsinnaanngilluinnartariaqaraluarpoq.

- Kalaallit akunnitsinni kultoorerigipput oqaatigineqarnera eqqortuunngilaq, pissaaneqartulli akornanni kultoorerineqartunut ilaavoq, atorfilittaq oqarpoq.

Angutip oqaloqatigineqartup aqqa atorfialu Sermitsiaq.AG-mit ilisimaneqarpoq.

Politikkikkut suliaqartut kinguaassiutitigut innimiilliortarnerannik innarliisarnerannillu paasissutissaateqaruit, oqaluttuarerusukkukkillu, taava Walter Turnowsky walter@sermitsiaq.gl imaluunniit +299 562248 aqqutigalugit saaffigisinnaavat.