Kanngutsaatsuliorneq: Tammaannarnissara neriuutigisimavara

Arnajaraq Joelsenip ukiut arfinillit missaat qaangiupput paasigamiut pissutissaqanngitsumik ersisarsimalluni, stresserluni aliasullunilu. Eqqugaaqqangaarami ernumagisimagaluarpaa inuunermini suleqqissinnaanerluni.

Maanna 30-nik ukioqarpoq, suliffeqarluni, aamma aatsaat misigaaq toqqissisimalluni.

- Imminut oqarfiginikuuvunga ukioq ataaseq kiisami nuanniitsunik eqqarsartarsimananga, susassaaleqisalersimallungalu. Inuunermi susassaaleqisinnaaneq nuannersutut isigiinnarpara, Arnajaraq Joelsen oqarpoq.

Kanngutsaatsuliorfigitereernermi kingorna oqaloqateqartalerpoq, tamannali tikinnginnerani Arnajaraq Joelsenip pisimasut akuersaaqqaartariaqarsimavai. Tamannali ajornaatsuinnaasimanngilaq.

- Meeraallunga pisimasut kanngutsaatsuliornerusimasut paasivakka. Taamaammat ukiorpassuarni nuanniilliorlunga misigisimavunga, siornatigulli misigisimasakka oqaasinngortissinnaasimanngilakka.

Eqqarsartarsimagaluarpormi kanngutsaatsuliorfigitittarsimanani.

Taamaattussaannartut isigalugu
Meeraalluni ilaqutaasa qanigisaat Arnajaraq Joelsenimut qanilliartuinnavissimavoq. Killisai qaangertalerpai, naggataatigullu kanngutsaatsuliorfigisalerlugu. 'Grooming'-erfigitittarsimanera tassani erserpoq.

Kanngutsaatsuliornerit aqqanilinnik ukioqarluni taamaatipput. Kinguaassiuutitigut atornerlunneqannginnami eqqarsartarsimavoq kanngutsaatsuliorfigineqartarsimanani.

- Pisoq soqutiginngitsuusaarpara, taamaattussaannartut isigisimallugu. Nammineq pisuugama taamaasiorfigineqartarsimallunga eqqarsartarsimavunga.

Arnajaraq Joelsenip ilaqutaasa angut kanngutsaatsuliortartoq avissaarfigimmassuk kanngutsaatsuliornerit taamaatipput.

Misigissusaarunneq
Kanngutsaatsuliorfigineqartarsimaneri Arnajaraq Joelsenimut kinguneqapilupput. Tassami 13-nik ukioqarluni imigassartortalerpoq, ilaatigut imigassartungaatsiartarsimalluni ajalusoornissami tungaanut.

- Imminut paarinngilluinnarpunga, nukappissanik kinguneratigullu angutinik atoqateqartalerpunga angusaqarfiginngisannik.

Arnajaraq Joelsenip meeraanera imaannaasimanngilaq, tassami ilaqutai imerajuttuusimapput. Meeraanera kiisalu kanngutsaatsuliorfigineqartarsimanera imminnut ataqatigiinngitsutut isigisarsimavai, tassami oqareernittut eqqarsartarsimavoq kanngutsaatsuliorfigineqartarsimanani.

- Misigissusaarutivissimagaluarpunga. Takusinnaalersimavara imminut iluaqutaanngitsumik pissusilersortalersimallunga, imminut naleqartikkunnaarsimallungalu, oqaluttuarpoq.

Eqqarsaatai nuanniitsut imartoorujussuanngorsimagaluarput.

- Eqqissinissara anguniarlugu tammaannarnissara neriuutigisalersimagaluarpara.

Killissani takusinnaalersimavai
Ajalusooreernermi kingorna tarnip pissusaanik ilisimasalimmik oqaloqateqartalerpoq ukiut arfinillit matuma siorna. Oqaloqateqartarninilu iluaqutigisimallugu oqarpoq.

- Killiliisinnaanngornikuuvunga imminut paarinerulerlungalu. Inuit paasitittalernikuuakka suut ajorinnginnerlugit nuannarinerlugilluunniit.

Nuummi aappaqanngitsut assigalugit suli illoqarfissiortarluni oqaatigaa, imigassartorujussuartarnerali qaangiutereerpoq.

Angummik peqateqarsinnaanini aamma nuannarilersimavaa.

- Arnaanera misigisinnaanngornikuuara, oqarpoq.

Meeqqat kanngutsaatsuliorfigineqartarnerat akuerisinnaanngilluinnarpaa
Kinguaassiuutitigut atornerluisarnerup anguneqarnissaa anguniarlugu suliniummut Killiliisamut peqataanissamut aperineqarami ingerlaannaq akuersisimalluni Arnajaraq Joelsen oqarpoq.

- Nukissanik aallersinnaasariaqarpoq ikiorserneqarnissaq anguniarlugu. Tassami inuunermi qaamaneqarpoq.

Atornerluisarnerit unitsilluinnarneqarnissaat kissaatigaa.

- Meeqqanut atornerluisoqartarnera akuerisinnaanngilluinnarpara.

Killiliisap suliniutaata pitsaasumik ingerlalernissaa, kiisalu anguniakkat pappiliamiinngiinnarnissaat, suleqataaffigerusuppaa.

- Meerarpassuit atornerlunneqartarput. Taamaattoqanngilluinnartussaagaluarpoq, Arnajaraq Joelsen oqariartuuteqarpoq.