Kanngusunneq, nipangersimaneq assigiinngisitsinerlu

Niviarsiaqqat qorsunnik qalersaqartartussat.

Tamanna inequnarlunilu pasinartoqarpasinngilaq. Tamannali niviarsiaqqanut inatsisitigut ataataqanngitsunut nuannersuunngilaq. Kikkuuneri takuneqarsinnaaniassammata ilisarnaataasussaapput.

Inatsisitigut ataataqanngitsuunerup sunniutaanik qulaajaanerup tamanna oqaluttuaraa. Nalunaarusiamik allattup qulaajaanermini inatsisitigut ataataqanngitsut 17-t apersorsimavai.

- Ataasiakkaat oqaluttuaraat niviarsiaqqat inatsisitigut ataataqanngitsut qorsunnik qalersaqartartussaasimasut, ilisarineqarsinnaaniassagamik, nalunaarusiami allaqqavoq.

Uumisaarineq
Inatsisitigut ataataqanngitsut kinaassusersiorneq tamanna kisiat misigisarsimanngilaat. Pineqartut apersorneqarnerat ilinniarsimasunik apersuinarmik ilaqarput, inuiaqatigiillu isumaannut inerniliineq paatsuugassaanngilaq.

- Inatsisitigut ataataqanngitsut taakkualu anaanaat nikassaanermik, assigiinngisitsinermik, inuiaqatigiinni akuersaarneqannginnermik, nipangiussiinnarnermik avataaniitsitsinermillu malunnaatilimmik isummerfigineqartarsimapput, nalunaarusiaq naqissusiivoq.

- Tamanna oqartussat inatsisinik atuutsitseriaasiisigut, inatsisitigullu ataataqanngitsut najukkami inuiaqatigiinnit qanoq isigineqarnerisigut malunniuttarpoq.

Inuiaqatigiillu isumaat sunniuteqarluni atuaqataannut pissusilersortitsisarpoq.

- Amerlanersaat taaguutipiloqartinneqartarsimapput, soorlu: ”Uersagaq”, ”Uersagarsuaq”, ”ataataqanngitsorsuaq”, ”uersagapajuk”, tamanna allaqqavoq.

Kinguaassiutitigut atornerlugaaneq
Taamatut meeqqanit inersimasuniillu ajortumik pineqarneq tamaanga killeqanngilaq. Ataasiakkaat kinguaassititigut atornerlunneqartarsimapput, tamannalu inatsisitigut ataataqanngitsuunerat toqqaannartumik ataqatigiissuteqarpoq.

- Ataasiakkaat oqaluttuaraat atornerlugaanerminnut atatillugu ataataqanngitsuunertik pissutigalugu naleqarnerusínnaannginnertik pillugu toqqaannartumik ilisimatinneqartarsimallutik.

- Ataasiakkaat nalilerpaat ataataqannginnertik pissutigalugu arlaannilluunniit illersugaannginnertik allat takusinnaammassuk pinngitsaalisaasimallutik.

Inersimasunngornermi ajornartorsiutit
Inatsisitigut ataataqanngitsut meeqqanit allanit ataataqaratik peroriartortunit ajornerusunik atugassaqartitaasimasut, ilinniarsimasut aamma apersorneqartut isumaqatigiissutigaat.

- Inuiaqatigiinnit akuersaagaanngillat katissimanngitsunik angajoqqaaqarlutik inunngorsimagamik, ataatartillu nalullugu, nalunaarusiaq inerniliivoq.

Tamanna tunuliaqutigalugu tupaallaatissaanngilaq inersimasunngornermi amerlsuunut nalikinnerusutut misigaluni ajornartorsiornermik aamma kanngusunnermik kinguneqartitsisarnera. Tamanna aappariinnermi aamma angajoqqaajunermi ajornartorsiortitsisarsimavoq, taamatullu aamma ilinniarnermut suliffeqarnermullu sunniuteqarluni.

Naak nalunaarusiap naqissuseraluaraa, inuiaqatigiit isumaat ukiuni qulit aamma 20-ni allanngornikuugaluartoq, ajoqusiinerup annerpaartaa qangali pisimavoq.

Tamannalu aamma amerlasuunut ataatassarsiornermik suliamik aallartitsinissaq annernartuusinnaaneranik isumaqarpoq, taakku 2014-imi tamanna periarfissarilernikuuaat.