Skip to main content

Kangilinnguit: Uuliap piiarneqarnera aasamut aallartissaaq

Kangilinnguani uuliamik mingutsitsinerup piiarneqarnissaa ajornaatsuinnaanngilaq. Illersornissaqarfik periutsinik uuliamik piiaasinnaasunik aasaru misileraaniarpoq.

Uuliamik mingutsitsineq illersornissaqarfiup nakkutigaa, aasarulu piiaarniarsarineqarniarpoq.

- Uuliamik mingutsitsinerup ajornartorsiutaanera Illersornissaqarfiup eqqumaffigilluinnarpaa, kangerlummullu uuliakoortoqarnersoq nakkutigiuarpaa, Frank Rasmussen, Kommuneqarfik Sermersuumi ingerlatsinermut avatangiisinullu aqutsisoqarfimmi pisortaq oqaluttuarpoq.

- Uuliakoortoqassagaluarpat puttasunik assersorneqassaaq, taanna nassuiaavoq.

Kommuneqarfik Sermersooq aamma illersornissaqarfik ukiup ataatsip affaalu avillugu Kangilinnguani saliineq suleqatigiissutigisimavaat. Illut ilarpasui atorneqartussaanngitsut piiarneqarput, eqqakkallu aamma peerneqarlutik.

Suliaq pisariusoq

Sakkutuut tassaniinnikuunerisa kingorna mingutsitsinermi suli salinneqartussarpassuit amigaatigineqartut, Arsummi umiatsiaararsorlutik aalisartut Sermitsiaq.AG-imi isornartorsiornikuuaat.

- Aalisartut isornartorsiuinerat paasisinnaavara, kisianni illersornissaqarfik saliinitsinni pitsaasumik ataavartumik suleqatigalugu saniatigut oqaatigerusuppara. Siulliuniarsarivugut, kisianni saliineq piffissamik atuinarpoq.

Ingammik uuliamik mingutsitsineq salikkuminaappoq. Kangilinnguani uuliamik mingutsitsinerit assigiinngitsut marluunerinik tamanna pissuteqarpoq. Ilaatigut uulia nunap iluani itisuumiippoq, sumiiffiillu ilaanni nuna mingutsinneqarsimavoq. Mingutsitsinerit taakku assigiinngitsut peerneqarnissaat assigiinngitsumik pisariaqarpoq.

- Illersornissaqarfik eqqortumik iliuusissanik nassaarnialeruttorpoq. Kangilinnguanilu uuliap piiarneqarnissaa aasaru siullermik misileraaffigineqassaaq, Frank Rasmussen nassuiaavoq.

Eqqakkat

Ukiut ingerlanerini eqqakkat assigiinngitsut kangerlummut eqqarneqartarsimasut, Arsummi aalisartut aamma tikkuarpaat. Taanna paasissutissaq illersornissaqarfimmut ingerlateqqinneqarsimasoq, Frank Rasmussenip nassuiarpaa.

Tamatuma saniatigut Arsummi aalisartut marsimi naapinniarpai, taamaalilluni eqqakkat sumiinneri uppernarsaatisiniassagamigit.

- Tassanilu aamma saliinissamut suut pilersaarutaanersut qanorlu pisoqassanersoq nassuiarniarpara. Aalisartullu aamma mingutsitsineq pillugu ilisimasaat tusaaniarpakka.

Ukiut ingerlanerini eqqarluni sungiusarnernut atatillugu imassat kangerlummiilersimasut aalisartut aamma tikkuarnikuuaat. Tassanilu avatangiisinut qanoq ajornartorsiutaanersoq misissoruminaatsoq, Frank Rasmussenip nassuiarpaa.

- Tamanna aalajangeruminaappoq, kisianni illersornissaqarfik annertuumik sumi eqqartoqartarsimaneranik sumiiffinnik tikkuaasinnaanersoq oqaloqatigaarput, taamaalillutalu nakkutigisinnaassallugu.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER