Grønnedal
Kangilinnguani maanna saliisoqassaaq
Illersorneqarnissamut naalakkersuisup Claus Hjort Frederiksenip aamma Naalakkersuisut Siulittaasuata Kim Kielsenip ullumikkut Kangilinnguani saliinissap aallartinneqarnissaa isumaqatigiissutigaat.
Ullumi ataatsimiinnermi isumaqatigiissutigineqarpoq suliaq sukkanerpaamik aallartinneqassasoq, Kangilinnguani sakkutooqarfeqaannarnissaa qulakkeerneqarmat. Tamatuma saniatigut alisinnerusoq isigalugu saliinerup ingerlatiinnarneqarnissaa piumasarineqarpoq.
Eqqakkat aamma illut peerneqassapput
- Kangilinnguani saliinissap aallartinnissaa isumaqatigiissutigigatsigu nuannaarutigaara. Pingaarnerpaq taassa piaarnerpaamik aallartinnissaq, eqqagassat peerneqassapput illullu atorneerussimasut isaterneqassallutik, Claus Hjort Frederiksen oqarpoq.
- Naalakkersuisuniit iluarisimaarparput suliaq aallartinneqalermat. Isumaqatigiippugut pingaartitaralugu saliineq qanimut suleqatigiilluta aallutissallutigu kommuneqarfik aamma qanimut oqaloqatigalugu. Sakkutooqarfiup maanna saliiniarluni aallartinnerata saniatigut Naalakkersuisunit alisinnerusoq isigalugu avatangiisinik saliisoqarnissaanik piumasaqaateqarnerput allanngunngilaq. Forsvarsministeriamik oqaloqateqartarnitsinni piumasaqaat tamanna aamma annikillissanngilaq, Kim Kielsen oqarpoq.
Forsvarsministeriap Kommuneqarrfik Sermersooq peqatigalugu illut sorliit atorunnaassanersut aalajangissavaat. Isaterineq, eqqakkanik sanaartukkanillu piiaaneq piaarnerpaamik aallartinneqassaaq.
Tassunga atatillugu aamma misissorneqassaaq nunaqavissut suliffiutillit sulisartullu kalaallit tamakku isumagineqarnerini sukkut atorneqarsinnaanersut, aamma Forsvarsministeriap Nunatsinni oqartussat peqatigalugit misissuissapput suliassat pitsaasumik avatangiisillu mianeralugit qanoq suliarineqassanersut.
Uuliamik mingutsitsineq oqaluuserineqassaaq
Forsvarsministeriap Naalakkersuisullu oqartussaasuisa uuliamik mingutsitsisimanerup qanoq aaqqinneqarnissaa pillugu oqaloqatigiinnertik nangissavaat, aammattaaq periutsit qanoq ittut tamakku salinneqarneranni atorneqassanersut misilittarneqassapput