Kangiata Illorsua: Takornariaqarnermi suliniut kinguaattoortoq
Ilulissani Kangiata Illorsuassaa minnerpaamik ukiumik ataatsimik kinguaattuussaaq, ukioq manna illup napatitsisutut sisannik ilusissaanik sanaartortoqarlunilu ikkussugassanngorlugit nassiunneqarsinnaasimannginnerat pissutaalluni.
Ilulissat Kangiata Illorsua illussanik titartaasartumit Dorte Mandrupimit titartarneqartoq, aatsaat ukiakkut 2021-imi ammaanersiornissamut piariissaaq.
Suliniummik suliaqaqataasut sanaartornerup 2019-imi upernaakkut aallartinneqarnissaa aalajangiuppaa. KJ Greenland suliniummit pingaarnertut sanaartortuussaaq.
Iluarsaassinerit
- Naatsorsuutigisamut naleqqiullugu suliniummik iluarsaassinerit, kiisalu illuliassamik pisariusinnaasumik annikitsortalersukkatut titartaanerit naatsorsuinerillu sivisunerusimapput, suliaqartut ilisimatitsipput.
Inuussutissarsiornermut Nukissiuuteqarnermullu Naalakkersuisoq Aqqalu Jerimiassen oqarpoq:
- Soorunami kinguartoorneq ugguaraarput, illumulli naatsorsuutigisatsinnut, aammalu siunissami Kalaallit Nunaanni takornariaqarnermut Kangiata Illorsuata ilorraap tungaanut sunniutaanik tunngaviusumik tamanna allannguissanngilaq.
Avannaata Kommuniani borgmesteri Palle Jerimiassen oqarpoq:
- Sumiiffimmut Kangiata Illorsua assorsuaq sunniuteqassaaq – aamma suliffissaqartitsineq eqqarsaatigalugu. Kinguartoorneq akorngutitut annikitsutut uggornartutut isigaarput, kommunilli anguniagaq tunaartaraa: Tassalu, Kangiata Illorsua sanallugu naammassineqassasoq.
Pisariusoq
Realdania By & Byg-imi pisortaaneq Peter Cederfeld oqarpoq:
- Ilulissani Kangiata Illorsua illulioriaaseqarnermi pisariusutut unammillerfiusussamillu iluseqarpoq. Qaasuitsullu killeqarfiata avannaani sanaartortoqarneq tamatigut silap pissusia pissutigalugu tamanna aarlerinartoqarfiullunilu ukiup ilaa sanaartorfissaq sivikitsuuvoq. Aalajangiineq imaannaasimanngilaq pisariaqarlunili. Sanaartornissap aallartinnissaanik kinguartitsinitsigut 2019-imi sanaartornerup aallartinnissaanut suut tamaasa piareernissaat maannakkut qulakkeersinnaalerparput.