Kangiata Illorsuassaanik titartaasimasoq Norgemi hvalcenterissamik titartaassasoq
Sanaartugassanik titartaasartup Dorthe Mandrupip hvalcenterissaq 250 millioner koruuninik nalilik, Qaasuitsup killeqarfiata avannaata tungaani 300 kilometerisut ungasitsigisumiittussaq titartassavaa
Danskeq sanaartugassanik titartaasartoq Forthe Mandrup Issittumi sanaartugassanik titartaanermik piginnaasaqannguatsiarpoq.
Taassumami Ilulissat Kangiata Illorsuassaatut siunnersuutaa qanittukkut napparnersiorneqarpoq.
Norgep avannaani Qaasuitsup killeqarfiata avannaani 300 kilometerisut ungasitsigisumiittumi, qeqertami Andenesimi hvalcenterissaq titartartussanngorpaa.
Norgemi inuussutissarsiortut tusagassiisarfiat E24 aamma Danmarkimi aviisi Berlingske taamatut allapput.
Centerissaq "The Whale"-mik taaguuteqartussaq katersugaasivittut takornariartarfittullu atorneqartassasoq eqqarsaataavoq. Taamaalilluni atuuffissaa Kangiata Illorsuanut assigussaaq.
Aamma “The Whale” Kangiata Illorsuata ilusilersugaaneranut assigussaaq, taamaattoq – paasinartumik – arferup sarpiatut iluseqarluni.
Norgemi NRK naapertorlugu suliassaq 2018.imi maajip qaammataani siullermeerluni saqqummiunneqarpoq. Taamanikkut pilersaarutaasimavoq 2020-mi naammassillugu suliarineqareersimassasasoq aamma danskit koruuniinik 150 millioninik naleqassasoq.
E24 aamma Berlingske naapertorlugit suliassaq 260 millioner koruunit angullugit akeqassaaq 2022-milu naammassineqarsimassalluni.
Suliniumut piginnittut arlaqaraluartut, ulluinnarni aqutsisoq Børre Berglund E24-mut oqarpoq, aningaasaliissutissat piginnittut akornanni qanoq agguataarneqassanersut suli isumaqatigiissutigineqarsimanngitsoq.
Hvalcenterissaq ilaatigut angalaffissanik saqqummiisartumit Lonely Planetimit maluginiarneqarsimavoq. Qeqertaq Andenes arfernik takornarniartitsisarfittut ilisimaneqareerpoq. Hvalcenteri ukiumut 70.000-inik takuniarneqartassasoq missingerneqarsimavoq. Missingiisimaneq allanngorsimanersoq takuneqarsinnaanngilaq.