Kangerlussuup siunissaa: Naalakkersuisoq innuttaasunik ataatsimiisitsinissamik nalunaaruteqarpoq
Naalakkersuisup Erik Jensenip ilisimatitsissutigaa, Qeqqata Kommunia suleqatigalugu Kangerlussuarmi innuttaasunik ukiup nutaap aallartinnerani ataatsimiisitsiniarluni, tassani nunaqarfimmi timmisartoqarfiup siunissaa oqaluuserineqassalluni. Maannamummi timmisartoqarfiup siunissaa pillugu pisortatigoortumik suli nalunaaruteqartoqarsimanngilaq.
Sulisartut kattuffianit SIK-mit Qeqqatalu Kommuniani kommunalbestyrelsimit Naalakkersuisut Kangerlussuarmi timmisartoqarfimmut atatillugu pilersaaruteqarnersut erseqqissumik paaserusunneqarsimavoq, timmisartoqarfik nunaqarfimmut 475-it missaannik innuttalimmut aningaasaqarnikkut siuarsaasut annersarimmagu.
Nuummi timmisartorsuarnut mittarfissaq nutaaq 2024-mi ukiakkut atulerpat, atlantikoq ikaarlugu angallassisarnerit tamarmik Kangerlussuarmiit Nuummut nuunneqarnissaat pilersaarutaavoq. Timmisartoqarfiup qanoq ingerlateqqinneqarnissaa apeqqutaalluni, nunaqarfimmi suliffeqarfiit arlallit atuutiinnarnissamut tunngavissaaruttussaasut, siusinnerusukkut nalunaarusiaasimasumi taamatut naliliisoqarsimavoq.
Sermitsiaq.AG-mit suliaq pillugu attaveqaasersuutinut naalakkersuisoq Erik Jenseni (S) novembarip qulingiluaanili apersorusunneqartarsimagaluarpoq, naalakkersuisorli ilanngutassiap matuma suliarieqannginnerani akissuteqarsimanngilaq.
Erik Jensenili Inatsisartuni ilaasortap Paneeraq Olsenip (N), Naalakkersuisut qaqugu Kangerlussuarmi innuttaasunut Nuummi mittarfik 2024-mi atulerpat Kangerlussuup siunissaa pillugu ataatsimiisitsiniarnersut pillugu apeqqutaanut allakkatigut akissuteqarsimavoq.
Suleqatigiissitat nalunaarusiaat suli naammassineqanngitsoq
Erik Jensen tassunga akissuteqarluni oqarpoq:
- Ataatsimiinneq naammassippat kommuni suleqatigalugu Kangerlussuarmi innuttaasunik ataatsimiisitsinissaq pilersaarusiorniarpara. Tamatuma ukiup nutaap aallartinnerani pinissaa naatsorsuutigineqarpoq.
Naalakkersuisoq aamma suleqatigiissitanut Kangerlussuup siunissaanik misissuisussanngorlugit pilersinneqarsimasunut tunngatillugu nutaarsiassaateqarpoq. Suleqatigiissitat suliaat 2022-mi ukiup affaani siullermi naammassineqarsimasussatut siusinnerusukkut nalunaarutigineqarsimagaluarpoq, sulili suliaq ingerlanneqarluni:
- Suleqatigiissitap nalunaarusiaq inaarsarlugu suliaraa, tamatumalu kingorna tamanut ammasumik saqqummiunneqassaaq, lyder det kort fra Erik Jensen naatsumik allakkatigut akissuteqarluni oqarpoq.
Ilanngullugu allappoq, Naalakkersuisut pingartumik nalunaarusiaq tamarmiusoq tunngavigalugu suliniutinik aallartitsissamaartut.
Kiffartuussinissamik isumaqatigiissummut 100 millioner koruunit immikkoortinneqarsimasut
2023-mut aningaasanut inatsisissap akuersissutigineqarneranut atatillugu, Mittarfeqarfiit kiffartuussinissamik isumaqatigiissuteqarfigineqarnissaannut 2025-mut 2026-mullu 100 millioner koruunit immikkoortinneqarsimapput.
Mittarfeqarfiit siunissaat pillugu inatsisissatut siunnersuummi nalilerneqarsimavoq, Kangerlussuarmi timmisartoqarfik najukkami timmisartoqarfittut ingerlateqqinneqassappat Mittarfeqarfiit kiffartuussinissamik isumaqatigiissutaannut ukiumut 105 millioner koruunik aningaasaliissuteqartoqartassasoq. Timmisartoqarfimmulli sakkutuujunngitsunik sullissisoqartassappat, Mittarfeqarfiit kiffartuussinissamik isumaqatigiissutaannut ukiumut 158 millioner koruunit atorfissaqartinneqassallutik.
Aningaasanut inatsimmi takuneqarsinnaanngilaq, pineqartunut sorlernut aningaasanik immikkoortitsisoqarsimanersoq.