Kangerlussuup siunissaa pillugu akissuteqartoqarnissaanik kommunalbestyrelsi piumasaqarpoq
Mittarfissuit nutaat ammarpata Kangerlussuarmi innuttaasut qanoq naatsorsuutigisaqarsinnaanerat pillugu Naalakkersuisut nalunaaruteqarnissaannik Qeqqata Kommunia ilungersuuteqarpoq, borgmesteri oqarpoq.
Nuummi mittarfissuaq nutaaq ukiut marluk qaangiuppata atulerpat, Kangerlussuarmi ilaqutariit sulisartukkormiut qanoq naatsorsuuteqassanersut, politikerit akissuteqarnissaat kattuffiup SIK-p piumasaraa.
Atlantikoq qulaallugu silaannakkut angallassisarneq Kangerlussuarmit Nuummut nuunneqarpat, naatsorsuinerit naapertorlugit Kangerlussuarmi Mittarfimmi atorfinnik amerlasuunik naleqartussaavoq, taannalu nunaqarfimmi suliffeqarfiit annersaraat.
Siunissaq pillugu kommuni erseqqissumik nalunaaruteqarnissamut ajornakusoortitsisoq, Illersornissaqarfik Naalakkersuisullu mittarfiup siunissaa pillugu suli isumaqatiginninniarnerat pissutigalugu, Qeqqata Kommuniani borgmesteri oqarpoq:
- Kommunitut maannamut iliuuserisinnaasagut killilerujussuupput. Pissutigalugu maannamut suli ilisimannginnatsigu Naalakkersuisut illersornissaqarfillu qanoq isumaqatigiissuteqassanersut. Taamaattumik oqaatigisinnaanngilara Kangerlussuarmiut siunissamut sunik naatsorsuuteqassanersut, Malik Berthelsen (S), Qeqqata Kommuniani borgmesteri, allagaqarluni Sermitsiaq.AG-mut taama oqaaseqarpoq.
Akissuteqartoqarnissaa naatsorsuutigigaat
Suliami Naalakkersuisunit akissuteqartoqarnissaanik kommunalbestyrelsi piumasaqarsimasoq, taanna oqarpoq:
- Kommunalbestyrelsemiit Naalakkersuisut piumaffiginikuuvagut innuttaasut oqaluttuuteqqullugit Kangerlussuup suneqarniarneranik. Naatsorsuutigaaralu piffissami aggersumi Naalakkersusiut taamaasiorumaartut, borgmesteri oqarpoq.
Illersornissaqarfik mittarfimmik 2.500 meteriusumik kissaateqartoq pisortatigoortumik nalunaarutigineqarnikuuvoq, kisianni sakkutuujunngitsunut silaannakkut angallannerup qanoq annertutiginissaa nalunaarutigineqarnikuunngilaq – Atlantikoq qulaallugu timmisartut Kangerlussuarmut mittarnissaat ilanngullugu.
Ingeniørit siunnersuisartut Rambøllimit 2018-imi nalunaarusiami Kangerlussuup siunissaa pillugu periarfissat tallimat misissorneqarput. Nuummi Ilulissanilu suliniutit piviusunngortinneqassappata, ataatsimut isigalugu ilaasut Kangerlussuarmut aqqusaartartut 6 procentiisa missaat kiserngorutissapput.
Angallattut ikileriarujussuarsinnaapput
Ukiumut ilaasut hundredetuusintilikkaanit ukiumut angalasut 20.000-t missaannut appariassapput, nalunaarusiami tamanna siulittuutigineqarpoq, angallattut 2016-imi amerlassusaannit taanna tunngaveqarpoq.
Kangerlussuarmi angallattut ikileriarnissaat naatsorsuutigineqaraluartoq, nunap immikkoortuani mittarfeeqqatut atuinnarnani mittarfissuartut ingerlaannarnissaa, Qeqqata Kommuniani borgmesterip neriuutigaa:
- Sianiilliornerussaaq mittarfik 2800 meteri pioreersoq takornariaqarnikkullu taamak periarfissaqartigisoq taamaallaat regional lufthavnitut atorneqarnissaa eqqarsaatigineqarsimappat. Qujanartumilli Naalakkersuisut oqariartuutiginikuuaat illersornissaqarfiup mittarfik minnerpaamik 2500 meteri atorfissaqartikkaa tamannalu inuinnarnit aamma atorneqarsinnaassasoq. Taamaattumik timmisartorsuarnik suli siunissami miffigineqartuaannarnissaanut neriulluarpunga, Malik Berthelsen oqarpoq.
Kangerlussuarmi takornariartitsinerup ilisimatusarnerullu ineriartortinnissaanut periarfissaqarluartoq, taanna isumaqarpoq, siunissamulli nalornineq aningaasaliinernut nutaanut tunuarsimaarnermik kinguneqarnerarlugu.
- Uagut aamma utaqqikatappugut
Apeqqut: Atlantikoq qulaallugu angallassisarnissamut suli periarfissaqarnera nalilerneqaraluartoq, Rambøllip nalunaarusiaa 2018-meersoq naapertorlugu amerlanavianngillat, nunaqarfimmilu innuttaasut amerlasuut atorfimminnik annaasaqarnissaat nuunnissamullu neqeroorfigineqarnissaat naatsorsuutigineqarpoq. Innuttaasut kommunimit qanoq ikiorserniarpisigit?
- Innuttaasut nuuttussat sumut nuunniarnersut Kangerlussuullu qanoq annertutigisumik atorneqarnissaa suli nalunarmat akisinnaanngilara, Malik Berthelsen oqarpoq.
Apeqqut: Siunissaq pillugu Kangerlussuarmi innuttaasunut qanoq oqarusuppit?
- Oqaatigisinnaasatauara tassaavoq aamma uagut pisortatigoortumik paasitinneqarnissatsinnut utaqqikatappugut.
Attaveqarnermut naalakkersuisoq Erik Jensen (S) SIK-mit isornartorsiuineq pillugu Sermitsiaq.AG sapaatip-akunnerani kingullermi apersuinissamut qinnuiginnippoq, allaaserisalli matuma saqqummiunnissaanut killigititap iluani akinngilaq.