Kangerlussuup Sisimiullu akornanni aqqusinissaq inissikkiartulersoq
Kangerlussuup Sisimiullu akornanni aqquisinissaq tusarniaassutigineqareersoq, Qeqqata Kommunia suliarinnittussarsiuussinissamut piariingajalerpoq.
Kangerlussuup aamma Kangerluarsuk Tulleq (etape. 1) akornanni aqqusinermut ASN-imut nalunaarumi tusarniaanermi piffissaliussaq marsip qiteqqunneranut killeqarpoq. Qeqqata Kommuniata pilersaarutigaa, aqquserniornerup aasamut aallartinneqarnissaa.
Aqquserniornerli aallatitsinnagu ASN pillugu nalunaarusiaq Naalakkersuisunit akuerineqaqqaassaaq. Qeqqata Kommunia naapertorlugu, Pinngortitamut Avatangiisinullu Naalakkersuisoqarfik tusarniaanermi akissuteqaatinik arfineq-pingasunik maannakkut suliarineqartunik tigusaqarsimavoq.
- Qeqqata Kommuniata neriuutigivaa, ASN-imik nalunaarusiaq Naalakkersuisunit kingusinnerpaamik maajip ingerlanerani akuersissutigineqassasoq. Tusarniaanermili akissuteqaatit peqqissaartumik suliarineqaqqaassapput, kommunimit tusagassiorfinnut nalunaaruteqarnermi oqaatigineqarpoq.
Nunarsuarmioqatigiit eriagisassatut kingornussassanngortitaat mianerineqassasoq
Tusarniaanermut akissuteqartut ilaannit arlalinnit oqaatigineqarpoq, nunarsuarsioqatigiit eriagisassatut kingornussassanngortitaat Aasivissuit-Nipisaat aqquserniornermi mianerineqartariaqartoq.
UNESCO-p nunarsuarmiunut eriagisassatut kingornussassanngortitsinermini ilaatigut tunngavilersuutigaa, sumiiffik ileqquusutut najugaqarfissatsialaasoq, kulturip inuilluunniit pinngortitamik sunniiveqatigiissutigisinnaasaat (…) Sumiiffiup nuarsuarsioqatigiinnut eriagisassatut kingornussassanngortinneqarnera ulorianartorsiulersinnaavo, aqquserniorneq aqqusinermillu atuineq uumasunut pinngortitamullu ajortumik kinguneqarpata, arlallit tusarniaanermut akissuteqarnerminni oqaatigaat.
Nukissiorfinnit erseqqissaassutigineqarpoq, aqquserniornerup tulliata aallartinneqarnera Sisimiut eqqaani imeqarfiup killeqarfianut kingunerluuteqarsinnaasoq. Imeqarfimmut killeqarfik aqqutigalugu aqquserniortoqassappat sanaartornermut ingerlatsinermullu aningaasartuuteqarnerulertoqarsinnaavoq, aamma tamatuma illoqarfimmi innuttaasunut suliffeqarfinnullu imermik pilersuineq ulorianartorsiortilersinnaavaa, Nukissiorfiit tusarniaanermut akissuteqarnerminni allapput.
ASN nutaaq suliarineqartoq
Kommunimit ilisimatitsissutigineqarpoq, Kangerluarsuk Tullerup Sisimiullu akiornanni aqqusinermut (etape. 2) ASN-imik nalunaarusiaq nutartigaq aammattaaq suliarineqaleruttorpoq aammalu 2020-mi apriilimi Namminersorlutik Oqartussanut nassiunneqassasoq naatsorsuutigineqartoq. Immikkoortup taassuma Sisimiuni imeqarfiup killeqarfiata aqqusaarneqartarnissaanik unammillernartoqarnera suliassartarivaa, taamatut ilisimatitsisoqarpoq.
Kommunimit ilisimatitsissutigineqarpoq, suliarinnittussarsiuussilluni aallartittoqangajalersoq, tassungalu atatillugu tallimanngornermi apriilip 17-ani entreprenørit, innuttaasut, tusagassiortut aammalu Sisimiut Kangerlussuullu akornanni angallannermut soqutiginnittut allat Qeqqata Kommuniata aggersarai.
Aqquserngup inissisimaffissaata digitalikkut assitaa aamma misissuisimanerit assigiinngitsut suliariumannittussarsiorlunilu atortut kommunip nittartagaatigut atuarneqarsinnaapput.