Kangerlussuup eqqaani piiaaffik aallarteriaannanngulersoq

Aatsitassarsiorfiit marluk ukiormanna ingerlanneqalissapput.

Hudson Ressourcesip Naajat eqqaani aatsitassarsiorfissamut piiaanissamut matusinissamullu akuersissummik pissarsimmat maanna piviusorsiorpalaarnerulerpoq.

Atuaruk: Hudson: - Suliarput tulluusimaarutigaarput

Anorthosit piiarneqassappit. Anorthosit glasfiberiliornermut, qalipaasiornermut aamma aluminiuliornermut atorneqarsinnaapput.

Aningaasaliissutissat inissereersimasut ingerlatseqatigiiffiup siornatigut nalunaarutigereerpaa. Greeland Venture suliniummut 20 millionit koruuninik aningaasaliissuteqarlutik kingullermik nalunaarutiginikuuaat.

Atuaruk: Anorthosit-mik piiaaffissami Kalaallit aningaasaleeqataasut

Hudson ukiaru anorthositinik piiaalereernissamut pilersaarut malillugu suliaqarpoq.

Naalakkersuisut akuersissuteqarnerisigut akuersissutit piumasarineqartut tamakkerpaat.

- Hudsonip tunisassiornissamut matusinissamullu pilersaarutaannut ataatsimoorluta paaseqatigiikkatta naammagisimaartorujussuuara.

- Suliassartaasut sukumiisortai, Hudsonip sanaartornermik tunisassiornermillu suliaqarnissaminik aallartissinnaanissaanut inissinneqartussat kisimik amigaataalerput, aatsitassarsiornermut naalakkersuisoq Múte B. Egede (IA) oqarpoq.

Atuaruk: Isumaginninnikkut akisussaaqataaneq aatsitassarsiornerup iluani nuannaartorineqalersimavoq

Hudsonip suliniutaa arlalinnik iluaquteqarpoq. Ilaatigut pilersinnissaa akisuallaanngilaq, ujaraaqqani assagaanera pissutigalugu. Piiaanerullu ingerlanissaa pisariippoq, ujaqqanik aserorteraluni immikkoortiterisoqartussaammat. Avatangiisinullu ulorianassusaat taamaammat annikippoq.

Tamatuma saniatigut aatsitassat umiarsualivimmit piiaaffiup qanittuani pilersinneqartumit toqqaannartumik kangerlummit assartorneqassapput.

Hudsonimi aatsitassarsiorfiup saniatigut rubinisiorfik Aappaluttoq aatsitassarsiorfinni ukiormanna ingerlasutuaassaaq.