Kangerlussuarmut tunngatillugu suleqatigiissitat kinguaattooqqasut
Folketingimut qinersinerup malitsigisaanik Kangerlussuup siunnissaa pillugu suleqatigiissitat kinguaattooqqapput, Illersornissaqarfiummi kissaataasa ilanngunneqarnissaat kissaatigineqarmat
Kangerlussuarmi innuttaasut siunissartik pillugu ilisimatinneqarnissartik naatsorsuutigigallassanngilaat. Tamanna Peter Olsenip (IA) § 37 naapertorlugu apeqqutaanut akissummi takuneqarsinnaavoq.
Suleqatigiissitammi timmisartoqarfiup taamalu nunaqarfiup siunissaanik qulaajaaniarnerat kinguaattooqqavoq, attaveqaqatigiinnermut naalakkersuisoq, Karl Frederik Danielsen (S) akissuteqaammini allappoq. Tamatumunnga tunngaviusoq danskit illersornissaqarfiat suleqatigiissitanut ilaatinneqarnissaannik kissaateqarneq.
- Illersornissaqarfiup suli Kangerlussuarmiinnissaminik kissaateqarneranut atatillugu Namminersorlutik Oqartussat Qeqqata Kommunianik peqateqarlutik suleqatigiissitaasa sulinissaannut piffissaliussaq allanngortinneqarpoq. Naalakkersuisut Kangerlussuup siunissaa pillugu suliaqarnermi Illersornissaqarfiup kissaataanik
ilanngussisarnissap kingunerisinnaasaanik ilanngussisarnissaq pingaartimmassuk, akissuteqaammi taamatut allassimasoqarpoq.
- Illersornissaqarfik peqatigalugu suleqatigiissitap suliassai upernaakkut sulinngiffeqarnissaq sioqqullugu folketingimut qinersisoqarnissaanik nalunaaruteqartoqarnera pissutigalugu kinguartinneqarsimapput.
Taassumali ilisimatitsissutigisinnaavaa, suleqatigiissitat maannamut sisamariarlutik ataatsimeereersimasut. Suleqatigiissitat sunarpiaq oqaluuserisimaneraat isertuussaavoq, Naalakkersuisut aalajangersimammassuk sulineq allanut tusarliunneqassanngitsoq.