Kangerlussuarsuup Sisimiullu akornanni pisuttarneq nuannarineqarluarpoq, kisianni amerlanngitsut tassuuna arpattarput.

Niels Tuutu Berthelsenili arpappoq, taanna Kangerlussuarmit tallimanngornermi nalunaaqutaq 16.00 aallarpoq, sapaammilu 160 kilometerit ingerlareerluni Sisimiunut sapaatiummat nalunaaqutaq 19.00 apuuppoq.

10 kiilunik nassataqartoq
Taassuma nassatat pingaarnerit katillugu 10 kiilumi oqimaassuseqartut soorlu sinngupuua, nalaffissaq, imeq, nerisassat panertut, energibarit, gassi, assiliivik, gps aamma satellittelefoni.

Isortartussuseq taanna 32 tiiminik sivisussusilimmik arpappaa, aqqutaanilu tiimit arlaqanngitsut sinittarsimavoq.

Atuaruk: Aqqusinniortoqassanersoq paaserusunneqartoq

Kiattoq
- Kiattorujussuunera seqinnarinneralu unammillernarnerpaavoq. Arpaffiup aallartinnerani kuuit arlallit panersimapput. Aqqutaatalu affaata missaanut killikkama kiannera imermillu amigaateqarnera pissutigalugu akunnerit arlallit unittariaqarpunga sinilaarlungalu. Seqineqarpallaarunnaarmat aatsaat ingerlaqqippumga, Niels Tuutu Berthelsen nassuiaavoq.

Tallimanngornermi 13 tiimit missaani arpappoq, tassani 70 kilometerit ingerlareerpoq, arfininngornerullu unnuaani akunnerit pingasuinnaat sinippoq, takornariat pisuttut akornusersuineri pissutigalugit.

Sisimiut nuisoq
Arfinnngornermi akunnerit qulingiluat arpappoq, sapaammiliu akunnerit qulit arpareerluni Sisimiut nuivaa.

- Ataatsimut isigalugu arpanneq iluarpoq. Aqqutaa pisuttarninnit qimussertarninnillu ilisimalluarpara. Tuttorpassuit takuakka, pinngortitarlu kusanartoq misigisaqarfigalugu, takornariallu naatsorsuutigisannit amerlanerit naammattoorpakka, Niels Tuutu Berthelsen oqarpoq.

Aqqutaa arpaffiusinnaasoq nammineq arpannini uppernarsaatitut isigaa - neriullunilu takornariaqartitsinikkut aqqutaa siunissami arpattarfittut nittarsaassinnaalerumaartoq.