Siunnersuut Inatsisartut upernaakkut ataatsimiinneranni eqqartorneqartussaanikuugaluarpoq, aningaasaqarnikkulli kingunissai nalilersoqqinneqaqqaarmata siunnersuut kinguartinneqarluni.

Maanna siunnersuut oqallisigineqartussanngorpoq, siunnersuutigineqarpoq Mittarfeqarfiit aktieselkabinngortinneqassasoq, suliffeqarfiullu siunissaa pillugu siunissamut aningaasalersorneqarnissaanut siunnersuummi ilassuteqartoqarluni.

Nuummi Ilulissanilu mittarfittaassat atulerpata suliffeqarfik ukiumut 105 millioner koruuninit 191 millioner koruunit tikillugu aningaasalersuisoqartassasoq naatsorsuutit takutippaat.

Amigartoorujussuarnissaq

Mittarfeqarfiit siunissamut aningaasalersorneqarnissaa pillugu apeqqut soqutiginaateqarluarpoq. Nuummi, Ilulissani Qaqortumilu mittarfiit naammassippata susoqassanersoq qulaajaasoqarluarnissaa suli amigaataassaaq.

Mittarfittaassat Kalaallit Airportsimit pigineqarlutillu ingerlanneqarnerat aqunneqassaaq. Tamanna pissutigisaanik Mittarfeqarfiit amigartooruteqartalernissaa naatsorsuutaavoq, suliffeqarfimmi Nuummi Kangerlussuarmilu aningaasarsiornerpaasarmat.

Mittarfeqarfiit aktieselskabinngortinneqassasoq Naalakkersuisut siunnersuuteqarput, Kalaallit Airportsillu ataani suliffeqarfiulissasoq siunnersuutaalluni.

Paasissutissat: Naalakkersuisut

Nuummi Ilulissanilu mittarfiit atuutilerpata mittarfinnut heliportinillu ingerlassisussatut Mittarfeqarfiit sullissinissamut isumaqatigiissuteqarfigineqassaaq. 2025-mit aallartittumik Mittarfeqarfiit qanoq aningaasalersorneqartalernissaat ima naatsorsuutigineqarpoq:

Paasissutissat: Naalakkersuisut

Siunnersuut akuerineqassappat aningaasanut inatsimmit 11,5 millioner kroner missaanniittut sipaarutaassapput.

Kalaallit Airportsimi Mittarfeqarfinnilu sammiveqatigiillutik aaqqissuussaanernik marluusunik pilersitsisoqarnissaanik siunnersuut pinngitsoortitsissaaq, taamaalillunilu maanna ilusiusumut naleqqiullugu tamanna annertuumik pitsanngorsaaviusussaalluni. Mittarfiit aaqqissuussaanermi ataatsimi ingerlanneqarnerisigut sunniivigeqatigiinnissaat ukiumut 33 millioner koruuninut naatsorsorneqarpoq. Imaappoq, Mittarfeqarfiit suliffeqarfittut nammineertitatut ingerlaannarluni Mittarfeqarfiit Kalaallit Airports A/S-ilu immikkut ingerlatiinnarneqarnerisigut, Mittarfeqarfimmut tapiissutissatut pisariaqartinneqartoq 33 millioner koruuninik annerussaaq.

Kangerlussuaq takinerusumik mittarfeqassappat aningaasaliissutit 53 millioner koruuninik amerlineqassapput

Kangerlussuaq takinerusumik mittarfeqarnissaa politikerit aalajangissappassuk, tapiissutit 53 millioner koruuninik amerlineqartariaqassasut tabellip takutippaa.

Imarpik qulaallugu inuinnarnik timmisartuussisarnermi Kangerlussuup mittarfittut
ingerlaannarnissaani periarfissaasumi tapiissutissatut pisariaqartinneqartussat eqqarsaatigalugit, illersornissaqarfiup Kangerlussuarmik atuiinnarnissaa pillugu illersornissaqarfimmut isumaqatiginninniarnermi angusassat apeqqutaassapput.

Mittarfeqarfinnut kiffartuussinermik isumaqatigiissummut nunap karsiata aningaasartuutissaanut matussutissatut, Nuummi Ilulissanilu mittarfiit nutaat atulernerini Nunap karsianut iluaqutissat arlallit aamma pilertussaapput. Iluaqutissat taakkua siunissami Mittarfeqarfinnut kiffartuussinermik isumaqatigiissutinut aningaasartuutissanut aningaasalersueqataassutigineqarnissaannut, iluaqutissanik taakkuninnga piviusunngortitsinissaq pisariaqarpoq.

- Tassani assersuutigalugu pisortat angalatitsinerisa sipaaruteqarfigisalernissaat, kiffartuussinermilu isumaqatigiissutinut sipaagaqarnissaq pineqarput. Pitsanngorsaanerit taakkua ukiunut tulliuttunut pisortat missingersuutaanni ersersinneqarunik, atugassanngortinneqarunillu pitsaasumik aatsaat iluaqutaasinnaapput, siunnersuummi atuarneqarsinnaavoq.

Inatsisartut sapaatip akunnerata matuma ingerlanerani siunnersuut oqallisigissavaat.