Kangerlussuarmi umiarsualivik nutaaq

Qeqqata kommuniata Kangerlussuarmi nutaamik umiarsualivittaarnissamik suliniuteqartoqassasoq akuersissutigaa. Kommunalbestyrelsip sapaatip-akunnerata siuliani ataatsimiinnermini tamanna akuersissutigaa.

- Kalaallit Nunaanni inuiaqatigiinni inuussutissarsiutitigut ineriartortitsinissamut
aningaasaliissuteqarnissaq pitsaanerpaasoq pillugu borgmester Hermann Berthelsen,
Aatsitassanut attaveqaqatigiinnermullu ataatsimiititaliami siulittaasoq Gedion Lyberth
kiisalu Nunaqarfimmi aqutsisuni siulittaasoq Knud Olsen peqatigalugit paasissutissiivoq.

Kommunimit tusagassiorfinnut nalunaarut naapertorlugu taamaallaat 33 mio. koruuninik aningaasaliineq ukiut pingasut-sisamat ingerlanerinnaani utertinneqarsinnaasunik pineqarpoq.

- Kangerlussuarmi umiarsualivik nutaaq pisariaqarluinnarpoq, umiarsualivimmi piusoq
taamaallaat 2 meterinik itissuseqarpoq. Tamanna tunngavigalugu umiarsuit pajuttaatit umiarsuillu takornariartaatit umiarsualiviup avataatungaani kisartariaqartarput, umiaasaaqqanillu umiatsianillu nassiussanik ilaasunillu ikaassuisoqartariaqartarluni,
Kangerlussuarmi Nunaqarfimmi aqutsisuni siulittaasoq Knud Olsen oqaluttuarpoq.

Taannali ilisimatitsivoq Umiarsualivimmi pissutsit pitsaasuunngilluinnaraluartut, umiarsuit takornariartaatit minnerusut
Kangerlussuarmi ilaasunik paarlaatitsisassallutik toqqarsimavat, umiarsuilli takornariartaatit anginerusut nunani eqqaamiuusuni ilaasunik paarlaatitsisarlutik.

- Tamatumalu kinguneraa Kalaallit Nunaanni mittarfeqarfinnut akitsuutinik isertitassanik kaaviiaartitassanillu annaasaqarneq. Nutaamik umiarsualivimmik pilersitsinermi umiarsuit amerlanerit anginerillu nunanut eqqaamiunuunngitsoq Kalaallit Nunaanni ilaasunik paarlaatitsisalernissaat periarfissaalissaaq, Gedion Lyberth kommunimit tusagassiorfinnut nalunaarut naapertorlugu oqarpoq.

Qeqqata Kommunia ilisimatitsivoq, Rambøll-ip ARTEK suleqatigalugu umiarsualivimmik pilersitsinissamut periarfissanik misissuisimavoq. Misissuinerup kingunerisaanik umiarsualivimmit pioreersumit 10 km-it missaanik ungasinnerusumi pilersitsisoqarsinnaanera paasineqarpoq, inissiivissatullu periarfissaasinnaasumi tininnerpaaffiani 10 meterimik itissuseqarpoq, umiarsualivillu umiarsuarnik 230 m-it missaat angullugit takissusillit tigusisinnaalluni, tassa umiarsuit ilisimaneqartut Kalaallit Nunaata kitaani avannaanilu angalasartut angalanissaminillu eqqarsaateqartut takeqqataat, kommuni ilisimatitsivoq, naliliillunilu. umiarsualivittaata sanaartorneqarnissaanut 23,4 mio. koruunit aningaasartuutigineqassasut naatsorsuutigineqartoq.

Umiarsualiviup tungaanut aqqusinniortoqassaaq, umiarsualivimmilu inissiivissanik kiisalu nassiussanik ilaasunillu sullissinissamut atortuutinik pilersitsinissamut periarfissaqarluartoq kommunimit tusagassiorfinnut nalunaarummi atuarneqarsinnaavoq, aqqusinniornerlu 9,8 mio. koruuninik aningaasartuuteqarfiussasoq naatsorsuutigineqarluni.
Kommunip naatsorsugai naapertorlugit sanaartornermut tamarmut aningaasartuutissat 33,2 mio. koruuniussapput. Siunissamut
ungasinnerusumut nassiussanut inissiivissamut sanaartornissamut 7 mio. koruuninik aningaasaliisoqarsinnaasoq teknikkikkut ilisimatuut naatsorsorpaat.

Kommunip naatsorsugaani aamma takutinneqarpoq, toqqaannartumik ilanngaatissat ilanngaatigereerlugit sipaarutissat pitsanngorsaanerillu ukiumut 3,5 mio. koruuniussasut, umiarsuillu takornariartaatit amerlanerit Kangerlussuarmi ilaasunik paarlaatitsisalernerisigut, Kalaallit Nunaannut angalasalersut amerlisinneratigut, inuiaqatigiinni aningaasaqarnikkut iluanaarutissat ukiumut 7,6 mio. koruuniunissaat naatsorsuutigineqartoq.

Borgmesterip Hermann Berthelsenip kommunimit tusagassiorfinnut nalunaarut naapertorlugu qularutiginngilluinnarpaa, nunatsinni timmisartoqarfik nunanit allanit tikinneqartartoq pitsaanerusumik umiarsualiveqarnissaa, Kalaallit Nunaanni
inuiaqatigiinnit tamanit silassorissutut isigineqassasoq, pilersitsinermimi umiarsuit takornariartaatit Kalaallit nunaata sinneranut takornarissanik angallassilluarnerulersinnaammata.

- Kalaallit Nunaanni takornariaqarnerup ineriartortinneqarnissaa siusinnerusukkut ingerlanneqaruni pitsaaneruvoq, borgmesteri
oqarpoq.