Skip to main content

Kangerlussuarmi suliffiit nutaat

Hermann Berthelsenip Vittus Qujaukitsullu nuannaarutigaat Sverigemi biililiorfiit Kangerlussuarmik soqutiginneqqilermata

Inuussutissarsiornermut, Sulisartoqarnermut, Niuernermut Nunanullu allanut Tunngasunut Naalakkersuisup Vittus Qujaukitsup, Qeqqatalu Kommuniata borgmesteria Hermann Berthelsenip sapaatip akunnerani qaangiuttumi Sverigep avannaani biilinik qitiusumik misileraasartut tikeraarsimavaat. Taamatut oqaluttuarpoq Qeqqata Kommunia kommunip nittartagaani allaaserisakkut, allaaserisarlu taanna namminersorlutik oqartussat nittartagaanni ilanngunneqarpoq.

2014-imi biilinik misileraanermik ingerlatsivik Arjeplog Test Management Kangerlussuup eqqaani biilinik misileraanissamut nunaminernik arlalinnik tunineqarpoq, politikerillu maanna malinnaatitsillutik Sverigep avannaani ingerlatsivik tikeraarpaat.

Tikeraarnermi pingaarnertut siunertarineqarsimavoq Arjeplog Test Management-mik suleqatigiinnerup qanittukkut pilersinneqartup aalajangersarneqarnissaa, siunertaralugu Kangerlussuarmi biilinik misileraavimmik ataavartumik pilersitsinissaq.

Suliffippassuit

Siusinnerusukkut paasissutissiissutigineqarsimavoq ilaatigut biilit BMW-mik meqqillit Kangerlussuarmi misilerarneqartassasut, ilanngullugulu oqaatigineqarsimalluni naatsorsuutigineqartoq centerimut nutaamut atatillugu suliffinnik nutaanik 250-it missaanniittunik pilersitsisoqassasoq.

Kommunip nittartagaa namminersorlutillu oqartussanit tusagassiorfinnut nalunaarut naapertorlugit biilinik tuniniaaviit soqutiginninnerat sulifinnik nutaanik kinguneqassaaq.

– Nuannaarutigaara ukiorpassuarni uninngareerluni biilinik misileraasarfiit Kangerlussuarmik soqutiginneqqilerseqqinneqarmata, sualuttumik issittumi biilinik misileraavissatut naleqqulluartutut. Tikeraarnerup kingorna paasinarsivoq ilimanaateqarluartoq svenskit annertuunik aningaasaliissuteqarnissaat, kommunimilu suliffinnik amerlasuunik pilersitsillutik.

Namminersorlutik Oqartussani naalakkersuisoqarfiit attuumassuteqartut qaammatini aggersuni kommuni qanimut suleqatigissavaat, qulakkeerniarlugu biilinik misileraanermik ingerlatsivinnut sinaakkutassatut atugassarisat suli pitsaanerulersinissaat. Naalakkersuisut 2014-imi aggustimili Kangerlussuarmi biilinik misileraanerit akitsuuteqartinneqannginnissaat aalajangiutereerpaat, biilinillu misileraaviup Kalaallit Nunaanni aallarteqqinneqarnissaanut arlalinnik unammilligassaqarpoq, minnerunngitsumik unnuiffissatut periarfissat eqqarsaatigalugit aammalu tamaani aqqusinnioqqinnissat, allaaserisami allassimavoq.

Aamma borgmester Hermann Berthelsenip nuannaarutigaa biilinik tuniniaaviit Kangerlussuarmi periarfissanik takunneqqilersimammata, inissiiffissaqqissutut nunavimmik silaannartaqarluni, mittarfissuaqarluni, aqqusineqarluarluni taserpassuaqarlunilu.

– Qularutissaanngilaq Kangerlussuup siunissaa pillugu Naalakkersuisut ersarissumik nalunaarutaat aningaasaliisut nunat allamiut iluarinartikkaat, borgmesteri erseqqissaavoq.

Ataatsimiinnerit arlallit

Aallartitat tikeraarnerminni ilaatigut ataatsimeeqatigaat Swedish Proving Ground Association-ip  siulittaasua, Arjeplog Test Management-ip pisortaa, Colmis-ip pisortaa, Tjintokk-imi qullersat, kiisalu Arjeplog kommunip sinniisui. Ingerlatsiviit misileraanermut atortutik takutippaat, aammalu Sverigep Kalaallillu Nunaata suleqatigiinnerisigut niuernikkut periarfissat saqqummiullugit, allaaserisami allassimavoq.

Tjintokk 1999-imiit 2004-mut Kangerlussuup eqqaani Sermersuarmi 120 kilometerinik ilorpasissusilimmi biilinik misileraaveqarpoq, tassani biililiorfiup VW-p biililiani model-it nutaat misilerartittarlugit. Arjeplog Test Managementip 2014-imi oktobarimi biililiortartut sullitani arlallit Kangerlussuarmi misileraaviugallartumi sullissimavai.

 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER