Kangerlussuarmi sukkaniunnissarsuaq pillugu ataatsimiisitsineq
Biilinik innaallagiatortunik sukkaniunnerit annersaat Kangerlussuarmi augustip naanerani pissaaq. Tamannalu pillugu innuttaasut pingasunngorpat ataatsimiigiaqquneqarput.
Sukkaniutinik Extreme E-nik pilersaarusiortartut ulluni makkunani Kangerlussuarmiipput. Pilersaarusiortartut Kangerlussuarmi pilersaarusiornermi saniatigut innuttaasut naapinniarpaat. Innuttaasullu Multihus-imi nutaami pingasunngormat nal. 19:00 ataatsimiitsinneqassasut, Qeqqata Kommunia paasissutissiivoq.
- Augustip naaleranerani susoqarnissaa Extreme E-mi pilersaarusiortartut Kangerlussuarmi innuttaasunut saqqummiunniarpaat, taama Qeqqata Kommuniani pilersaarusiornermi pisortaq, Laust Løgstrup oqarpoq.
Tikeraat 500-t sinneqartut
Sukkaniuttartut tusaamasarsuit, aaqqissuisut, assiliisartut tusagassiortullu sukkaniunnersuarmi Extreme E-mi augustip 28-aniit 29-ata tungaanut Kangerlussuarmiisapput. Aaqqissuisut ilaasa qaammat sinnerlugu Kangerlussuarmi piareersassasut, kommunimi pilersaarusiornermi pisortap oqaatigaa.
Biilit innaallagiatortut sukkaniunnerini Kangerlussuarmi Akuliarusiarsuup kuuani sermersuup ungasinngisaani ingerlanneqassaaq.
Silaannaap allanngoriartornera ukkatarineqarnerunissaa anguniarlugu Extreme E-mik taallugu sukkaniunnerit pilersinneqarput. Sukkaniunneq siulleq Saudi Arabiami pivoq, tassanilu inoqajuitsut annertusiartorneri ukkatarineqarlutik.
Sukkaniunnissap nittarsaaneqarnera annertunerutinniarlugu Qeqqata Kommunia, Arctic Circle Business Visit Greenlandilu sukkaniutitsisartut Extreme E qanimut suleqatigaat.
Extreme E-mi sukkaniunnerit TV-ikkut nunani tamalaanit 180-iusuni isiginnaarneqarpoq, inuillu nittartakkakkut naapittarfiini inuit 87 millioninit amerlanerusunit allaaserineqarpoq.