Kangerlussuarmi mittarfik qaammatini pingasuni asfaltilersorneqarsimasoq
Kangerlussuarmi mittarfiup iluarsaanneqarnerani asfalti tonsinik arlalinnik annertussusilik atorneqarsimavoq.
Kangerlussuarmi mittarfik aasap ingerlanerani iluarsaanneqangaatsiarsimavoq.
Mittarfeqarfiit sulisui arfineq-marluk qaammatit pingasut atorlugit mittarfimmik iluarsaassisimapput, suliffeqarfiup Namminersorlutik Oqartussanit pigineqartup nittartagaani tamanna atuarneqarsinnaavoq.
- Asfaltit tonserpassuit atorpagut. Juunip aallartinnerani Danmarkimi asfaltiliorlunilu asfaltilersuinerup iluani suliffeqarfiit siuttut ilaat Colas ikiortigaarput. Juulip qaamataanit avataanit ikiorserneqarata nammineq asfaltiliorsinnaalerpugut, asfaltilersuisinnaalerluta, aamma asfaltimik iluarsaassisinnaalerluta, mittarfeqarfimmi sulisoq Jørgen Boller mit.gl-imut oqarpoq.
Asfaltimik qapiaasartumik aammalu asfaltiliortarfimmik angallattakkamik Mittarfeqarfiit aningaasaliisimavoq, aappagumullu Air Greenlandip hangareqarfiata sioraani unittarfiusoq suleqatigiit iluarsaallugu aallartissagaat, nittartakkami atuarneqarsinnaavoq.