Kangerlussuarmi innuttaasut nioqqutissanik amigaateqarneq pakatsissutigigaat

Ukiuunerata takisuup naajartornerani aamma umiarsuup pajuttaatip siulliup tikinnginnerani, Kangerlussuarmi Pilersuisumi nioqqutissat amigaateqartarnerat nalinginnaasuuvoq. Innuttaasut tamanna sungiusimaleriartorpaat.

Kisianni ukioq manna immikkut ittumik ajorsimavoq, maannalu nunaqarfimmi mittarfeqarfiusumi innuttaasut naammaginnikkunnaarput.

- Aasalernerani amigaateqartoqartuaannarpoq, umiarsuullu pajuttaatip siulliup tikinnissaa qilanaariinnarneqarsinnaasarpoq. Kisianni maanna ingasappallaalilerpoq, nioqqutissanik aatsaat taama amigaateqartoqartigaaq. Iliuuseqartoqartariaqarporlu, Kirsten Berthelsen KNI-mut ammasumik allakkamini taama allappoq.

Umiarsuaq siulleq aamma tikereeraluartoq, nioqqutissanut ilisivinnut imaqanngitsunut iluaqutaavallaanngilaq.

- Taava takorluulaariarsiuk maajip 29-anni umiarsuaq tikittoq paasillugu sodavandit aamma imigassat kiisalu nioqqutissat qerisut amerlanngitsut kisimik tikisinneqartut. Nioqqutissat amerlasuut piffissami sivisulaami maanna amigaatigineqarput.

Umiarsuaq tikippoq

Umiarsuaq nalinginnaasoq siulleq maanna Kangerlussuarmut tikissimalertoq KNI nassuiaavoq, ajornartorsiullu maanna aaqqinneqarsimassalluni.

- Umiarsuaq nalinginnaasoq siulleq Kangerlussuarmut ippassaq, sapaammi juunip 16-anni tikippoq, maannakkullu allagaqarnitsinni umiarsuaq usingialeruttorparput, pisiniarfimmilu nioqqutissanut ilioraaviit pisiniartartut ujartorsimasaannik immileruttorlugit, Pilersuisumi pisiniarfeqarfinnut pisortaq, Niels Andersen, Sermitsiamut akissuteqarluni allappoq.

Kirsten Berthelsenip nioqqutissat ujartugaasa ilagaat:

• Iffiukkat: rundstykkit, baguettet, flutesit, toastit iffiartaat, iffiat, pitabrød, pølsebrød, burgerbrød allallu.
• Suaasat
• Immuk: Immuk kimikitsoq, soyamælk aamma allat.
• Qallersuutit:
• Pålæg: hamburgerryg, sukkulaat qallersuutissat allarpassuillu.
• Meeraaqqanut nerisassat aamma nangit allallu.
• Kukkukuut saaneqanngitsut, nersussuup neqaa aserortigaq allarpassuillu.
• Mayonnaise, ketchup, dressing allallu.

Kirsten Berthelsenip taakkartugassaasa taakku ilaminiinnaraat.

Ukiuunerani pilersuineq pitsanngorsarniaraat

Niels Andersnip maalaaruteqarneq itisilersinniarlugu Kirsten Berthelsenimut nammineq attaveqarsimalluni oqaluttuaraa. Tamanna Kangerlussuarmi Pilersuisumi paasissutissiilluni ataatsimiititsinermik kinguneqarpoq, ukiuunerani pilersuinerup qanoq pitsanngoriarsinnaaneranik siunnersuuteqartoqarluni.

- Qaammatini qulingiluani tulliuttuni qanoq annertutigisumik tunisaqarnissatta siulittuutiginissaa ajoraluartumik ajornakusoorsinnaasarpoq, pisut assigiinngitsut amerlasuut sunniuteqarsinnaasaramik, - nuuttartut qanoq amerlatigippat, takornariat qanoq amerlatigisut nunaqarfimmut tikittarpat, pisut apeqqutaallutik ilaasut sivikitsumik imaluunniit sivisunerusumik aallarnaveertarpat, allarpassuillu, taakku tamarmik pisut nioqqutissaatinut sunniuteqartut, kisianni suliassaq tamannarpiaq minnerunngitsumik aaqqiiviginiagassaraarput.