Kangerlussuarmi ilinniarfik pillugu erseqqissaaneq

Kalaallit Nunaanni sakkutuutut ilinniarnermik aamma Kalaallit Nunaanni sakkutuujunngitsunut upalungaarsimanermik ilinniarnermik neqerooruteqarnerit assigiinngissutaat annertuvoq. Tassanilu eqqarsaatigilluakkamik sakkutuujunngitsut toqqaneqarput, illersornissamut ilisimasalik taama oqarpoq, taassuma ilinniarfik nutaaq ilinniakkanut allanut soorlu politiitut qatserisartutullu ilinniarnissamut aqqutissatut isigaa.

Kangerlussuarmi sakkutuujunngitsunut upalungaarsimanermi ilinniarfittaarnitsinni, kalaallit inuusuttut Sakkutuunngorniarfimmi ilinniarfimmi ilinniarsinnaajunnaarnerannik isumaqanngilaq. Sakkutuutut ilinniarfimmi ilinniakkamik toqqaasinnaaneq suli periarfissaassaaq, IA aamma Siumut Sermitsiamut uppernarsaapput.

Illersornissamut ministerip Morten Bødskovip aamma Nunanut Allanut, Inuussutissarsiornermut Niuernermullu Naalakkersuisup, Vivian Motzfeldtip, Issittumi piginnaasanik annertusaanerup Kalaallit Nunaanni pilersinneqartussaq pillugu politikkikkut sulianik aallartitsisumik marlunngormat unnukkut isumaqatigiissut atsiorpaat. Tassani dronit, qaammataasatigut nakkutilliinerup annertusineqarnissaa, nunami tigooraavimmik pilersitsinissaq, sineriammi radarit kiisalu suliat attaveqatigiinnerullu nukittorsarneqarnissaa aamma Kangerlussuarmi upalungaarsimanermik ilinniarfik nutaaq; katillugit akeqassaaq 1,5 milliardit koruunit.

Aviisi Sermitsiaq taama allappoq.

Isumaqatigiissut malunnartoq

Kristian Søby Kristensen, Københavns Universitetimi Center for Militære Studierimi ilisimatusartuunerup isumaqatigiissummi pingaartumik pingasut maluginiarpai.

– Siullermik upalungaarsimanermi ilinniarneq isumaqatigiissummi initoorujussuuvoq, tamannalu ilinniarfiup nutaap Kalaallit Nunaannut takussutissatut annertuumik pingaaruteqarneranik takussutissaavoq. Aappaattut Kalaallit Nunaat sakkutuut suliaannut innuttaasullu peqataatissanerlugit apeqqutaatinneqarpoq. Tamannalu pissutigalugu ilinniarfiup upalungaarsimanermi ilinniarfittut aalajangiunneqarsimagunarpoq, tamannalu isumatusaarneruvoq. Sakkutuujorusulluinnaraanni Sakkutuunngorniarfimmi ilinniartoqarsinnaavoq, unalu Kalaallit Nunaanni ilinniarfik atitunerusumik tunngaveqarpoq, Kalaallit Nunaannilu ilinniarfinnut allanut ingerlariaqqiffiusinnaalluni, soorlu politiitut qatserisartutullu.

– Isumaqatigiissummi kalaallit suliffeqarfii illut nutaat sanaartorneqarnerinut ingerlanneqarnerinullu qanoq ilaatinneqarnissaat pillugit qanoq annertutigisumik allassimasoqarnera, aappaattut soqutiginarpoq. Amerikamiut Pituffimmi sakkutooqarfiat assigalugu ingerlatsinermut suliassat annertuut suliarinissaannut soqutiginnittoqarpasippoq, tamannalu aamma danskit soqutigisarissavaat, soorunami suliarinnittussarsiuussinermut piumasaqaatit iluanni pissalluni. Pingajuattut isumaqatigiissummi oqaaseqatigiit kingulliit maluginiagassaapput, illersorneq pillugu isumaqatigiilernissap tulliuttup piareersarnerani Naalakkersuisut ilanngutitinneqarnissaat pillugit isumaqatigiittoqartoq, tassani atuarneqarsinnaavoq.

Aviisimi Sermitsiami atuarnerusinnaavutit. Aviisi uani pissarsiariuk:

Powered by Labrador CMS