Kangerlussuarmi coronavirusimut misissuisoqareerpoq
Peqqinnissaqarfik innuttaasunik coronavirusimik tunillatsissimasutut pasineqartunik napparsimavimmut unitsitsinngikkaluarlutik misissuinissamut periarfissaqareersut naalakkersuisoq Martha Abelsen ilisimatitsivoq
Nunatsinni mittarfinni nunanit tamanit tikinneqartartuni Covid-19-virusimik atortut nuunneqarsinnaasut atorlugit misissuisarnissaq Naalakkersuisut pilersaarutigineraat Tlllie Martinussenip (Sam) apeqqutaa naalakkersuisumit Martha Abelsenimit ima akineqarpoq:
- Peqqinnissaqarfik innuttaasunik COVID-19-imik tunillatsissimasutut pasineqartunik napparsimavimmut unitsitsinngikkaluarlutik misissuinissamut periarfissaqareerput, misissuinerit inini misissuisarfissatut toqqarneqareersimasuni pissapput kingornatigullu innuttaasut angerlarsimatitaasussanngortassapput nakkutigineqarlutillu. Assersuutigalugu Danmarkimit tikittut ilaannik tunillatsissimasutut pasitsaassaqartoqarnera pissutigalugu Kangerlussuarmi COVID-19-imik misissortittoqarnikuuvoq.
Atortunik pissarsiniarneq
Laboratoriamik nuunneqarsinnaasumik sumiiffiit ilaanni ikkussinissaq pilersaarutigineqanngitsoq Martha Abelsen ilisimatitsivoq.
- Maannakkorpiaq laboratoriami COVID-19-imik suussusersiinissamut pisariaqartinneqartunik atortoqanngilaq taamaaliornissamullu piginnaasalinnik sulisoqarani. Atortunik pisariaqartinneqartunik pissarsinissamut periarfissat misissorneqarput, taamaattumik piffissap ingerlanerani nunatsinni COVID-19-imik nappaammik laboratoriami suussusersisoqarsinnaalernissaa neriunnarpoq, oqarpoq.
Tunillatsittoqarsimaneranik pasitsaassisoqartillugu allanut tunillaasinnaaneq pissutigalugu innuttaasut napparsimavimmukartinnatik peqqissaavimmukartinnatilluunniit peqqinnissaqarfimmut sianertarnissaat pingaaruteqartoq oqaatigaattaaq.