Skip to main content

Kangerlussuaq: Inerteqquteqartitsilernissamik piumasaqarneq nakorsaanerup itigartippaa

Danmarkimiit angalasut Kangerlussuarmut tikinnerminni timmisartoqarfimmit aninissamut inerteqquteqarfigineqanngillat, inerteqquteqartitsilernissarlu aamma kissaatiginarani, nakorsaaneq oqaluttuarpoq.

Danmarkimiit silaannakkut angalallutik tikittut nunattalu iluani angalasut timmisartoqarfimmit anillutik ingerlasinnaanerat, Kangerlussuarmi innuttaasut toqqissisimanarinngilaat.

LÆS OGSÅ: Kangerlussuaq: Timmisartumik tikittut toqqissisimatitsinngillat

Timmisartoqarfik imarpik qulaallugu timmisartorsuup tikinnginnerani akunneq ataaseq sioqqullugu matugallarneqartarpoq, innuttaasunit susassaqanngitsunit isersimaffigeqqusaajunnaarlugu. Innuttaasut taamaasillutik tikittunut akulerussimasinnaatitaanngillat. Kangerlussuarmi nunaqarfimmi aqutsisuni ilaasortap, Johan Langep, kissaatigilluinnarpaa timmisartorlutik tikittut aallaqqinnginnerminni timmisartoqarfimmi isersimaannarnissaat.

Inerteqqutaanngilaq

Angalasulli timmisartoqarfissuarmiiginnaratik silami pisussinnaanerat peqqinnissaq eqqarsaatigalugu isumatusaarnerusoq, nakorsaaneq Henrik L. Hansen Sermitsiaq.AG-mut ilisimatitsivoq.

Allakkatigut akissuteqarluni nassuiaavoq Danmarkimiit tikittut timmisartoqarfiup silataani pisussinnaanerat inerteqqutaanngitsoq, tamassumalu inerteqqutaalernissaa "kissaatiginanngitsoq".

- Danmarkimiit tikittut utaqqinerminni silamiissinnaapput, sumiiffimmiluunniit pisuttuarlutik. Taamaasiorpata taava timmisartoqarfiup iluani katersuuttoqalernissaa pinngitsoortinneqarsinnaavoq, tamannalu peqqinnissaq pillugu isumatusaarnerummat soqutigilluinnarparput, nakorsaaneq Henrik L. Hansen nassuiaavoq.

Pisiniarfinnut iserasi

Angalasulli Pilersuisumut pisiniarfinnulluunniit allanut pisiniarlutik isernissaat isumatusaarnerpaanngitsoq, nakorsaaneq ilisimatitsivoq. Pisiniarfinnulli isinnginnissaat innersuussutaannaavoq:

- Angalasut pisariaqarluinnartillugu, soorlu nerisassarsiniartariaqarnermi najoqqagassarsiniartariaqarnermilu Pilersuisumut niuertarfinnulluunniit allanut aatsaat pisiniarsinnaanerannik innersuunneqarput, oqaatigineqarpoq.

Kangerlussuarmili niuertarfiutillit innersuunneqarput silami pisiniarfiusinnaasunik nerrivinnik nappaaqqullugit. Taamaasiornermi tikittut innuttaasullu pisiniartut inissaqarnerulernissaat anguneqarsinnaammat.

Juunip 15-anit juulip aallaqqaataat ilanngullugu Danmarkimiit tikittussat katillugit 1199-it tigusiffigalugit misissorneqareersimasut, nakorsaaneqarfik ilisimatitsivoq. Misissuinerit tamarmik covid-19-imik takussutissaqarsimanngillat, angalasussallu tamarmik nunatsinnut angalasinnaasimallutik. Nunatta ammarneqarneranit ammariartuaarnermi immikkoortoq siulleq juunip 15-anili atulerneranit, coronavirusimik napparsimasoqalersimaneranik nunatsinni suli paasisaqartoqanngilaq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER