Kangerlussuaq: Iluarsaassinissamut pisariaqartitsineq qulaajarneqaqqaassaaq
Kangerlussuup iluarsartuunnissaanut ingerlannissaanullu isumaqatigiissummik atsiorneqarsimasumik peqanngilaq
Naak illersornissamut ministerip Trine Bramsenip (Soc), mittarfiup iluarsaanneqarnissaa qallunaat illersornissaqarfiata akilissagaat akuerereeraluaraa, taamma qanoq annertutigisumik iluarsaanneqassanersoq erseqqissumik oqaatigisinnaanngilaa.
Aammattaaq atortut mittarfiup ingerlanneqarneranut toqqaannartunik atuumassuteqartut imaluunniit illut, innaallagissiorfiup allallu iluarsaanneqarnissaat pisariaqartut illersornissaqarfiup kisimi akilissanerai, maannamut akineqarsinnaanngikkallarpoq. Illersornissamut ministeriaqarfik Sermitsiaq.AG-mit apeqquteqarfigineqareerluni taama ilisimatitsivoq. Iluarsaassinerit annertussusissaat aamma aningaasartuutit amerlassusissaat, siunissami sakkutuut aamma sakkutuujunngitsut pisariaqartitaannit aalajangerneqassapput.
Taamatuttaaq aamma ingerlatsinermi qanoq annertutigisoq illersornissaqarfiup akilertassaneraa oqaatigissallugu siusippallaarpoq, illersornissaqarfiup Kangerlussuarmik atuinerata 2023-ip kingorna qanoq iluseqarnissaanik suliaq aatsaat aallartimmat.
Attaveqarnermut naalakkersuisoq, Karl Frederik Danielsen (S) KNR-imit apeqqummut toqqaannartumik akissuteqarnermini oqaluttuarpoq, illersornissaqarfiup ingerlatsineq aamma iluarsaassinissaq akilernissaa pillugu isumaqatigiissummik suli saqqummiunneqanngitsumik peqartoq. Taamaattumik isumaqatigiissusiortoqarsimanngitsoq, illersornissamut ministeriaqarfik ilisimatitsivoq. Sermitsiaq.AG-p Illersornissamut ministeriaqarfimmut apeqquteqarnerata kingorna Karl Frederik Danielsen (S) aamma ”erseqqissaavoq”, taamaattumik isumaqatigiissusiortoqarsimanngitsoq.