Kangerlussuaq: Air Greenlandip nunat tamalaat akornanni timmisartuussisarnissaq ilimaginngilaa
Naalakkersuisut kissaatigaat, Kangerlussuaq imarpik qulaallugu mittarfittut atuutiinnassasoq. Air Greenland ullumikkut mittarfimmut timmisartuussisartuusoq, mittarfiup nunat tamalaat akornanni timmisartuussivigineqartarnissaa ilimaginngilaa. Mittarfiit imminni atorneqarnissamut ujartuinermik pilersitsisanngillat, niuernermut tunngasuni pisortaq oqarpoq.
Kangerlussuarmi Mittarfiup Nuummi nunat tamalaat akornanni mittarfik nutaaq aappaagu ammarpat allannguiffiusorujussuusussaq eqqarsaatigalugu Naalakkersuisut qanoq piniarnerat pillugu akissutinik innuttaasut, kattuffiit illuatungiliuttullu sivitsortumi pissarserusussimapput.
Attaveqaasersuutinut Naalakkersuisoq, Erik Jensen (S), sapaatip-akunnerani kingullermi pingasunngornermi oqaaseqarpoq, Sermitsiaq.AG-mullu oqaluttuarluni, Danmarkimut isumaqatigiissuteqarnissaq Kangerlussuullu nunat tamalaat akornanni mittarfittut ingerlaannarnissaa Naalakkersuisut neriuutigigaat.
Naalakkersuisut maannamut Kangerlussuup nunap immikkoortuani mittarfittut ingerlanneqarnissaanut taamaallaat aningaasaliissutinik aningaasanut inatsimmi immikkoortitsisimapput, kisiannili neriuutigalugu, Danmark ukiumut 53 millioner koruuninik immikkut Kangerlussuup nunat tamalaat akornanni mittarfittut ingerlaqqinnissaanut pisariaqartussanik akileeqataajumassasoq.
Nunalli tamalaat akornanni mittarfik immini ilaasorpassuarnik pilersitsisinnaanngilaq, Air Greenlandilu Kangerlussuup nunat tamalaat akornanni timmisartuussivittut ingerlatiinnarnissaanik pilersaaruteqanngilaq, Air Greenlandimi niuernermut tunngasuni pisortaq, Henrik Bjørner Søe oqarpoq:
Ilaasussaqartariaqarpoq
- Tassunga timmisartuussiusimasoqassanersoq eqqarsaatigalugu ataasiinnaq aalajangiisuuvoq. Tassalu ilaasussaqarnersoq. Mittarfeqarfik mittarfillu takornariaqarnermik pilersitsisanngillat. Ornigassaq pilersitsisarpoq. Taamaattumik arlaannik peqarpat naammattumik amerlassusilinnik tikeraarusunneqartumik, taava tassunga timmisartuussisarnissamut tunngavissaqarluassaaq, Henrik Bjørner Søe oqarpoq ilassuteqarlunilu:
- Taamaattumik takornariaqarnikkut sammisassaqarpat naammattunik ingerlanneqarluartunillu aamma Kangerlussuarmi unnuinissamut pitsaasunik periarfissaqarpat naammattunik takornarianik naammattumik amerlassusilinnik tigusisinnaasunik, taava imarpik qulaallugu timmisartuussinissanut aamma niuerfissaqassaaq.
- Ullumikkut pissutsit imaapput, imarpik qulaallugu timmisartorsuarmut ilaasartut 60 procentiisa missingi Ilulissanut Nuummullu angalasuusarlutik. Kangerlussuarmi torrallataasumik ineriartortitsineq aqqutigalugu tassani piumasaqartoqarneranik pilersitsisoqarsinnaappat, taava periarfissaqassaaq.
Kiffartuussinissamut isumaqatigiissut pisariaqalersinnaasoq
- Pingaaruteqarpoq oqaatigissallugu, isumatusaarnerutillugu niuernikkut ingerlatarineqarsinnaatillugu ornigassanut tamatigut timmisartuusseruttaratta. Taamaattoqanngippat, taava tamanna kiffartuussinissamut isumaqatigiissut aqqutigalugu isumagineqartariaqassaaq.
Air Greenlandip ullumikkut angallasseriaaseq tunngavigalugu naatsorsuutigaa, Nuummi Ilulissanilu mittarfiit nutaat ammarneqarsimaleriarpata Kangerlussuarmut nunat tamalaat akornanni timmisartuussinissamut tunngavissaqarnavianngitsoq.
- Nunat tamalaat akornanni timmisartuussivimmik pilersitsinissamut pilersaaruteqanngilagut, niuernerpalaaratumik ingerlanneqarsinnaasumik niuerfissaqanngimmat. Ullumikkut pioriinngitsunik pilersitsisoqanngippat Kangerlussuup siunissami nunat tamalaat akornanni mittarfiunissaa takusinnaanngilara.
Nuuk Ilulissallu pingaarnertut ornigassanngussasut
Apeqqut: Tamatumani suna tunngavilersuutigaajuk?
- Oqarsinnaavutit, Kangerlussuarmi nunat tamalaat akornanni timmisartuussissaguit, ullumikkullu timmisartorisatsinnik taamaaliortoqassappat, taava issiaveqarpoq 305-inik, taakkualu timmisartuussigaangatta ullumikkut Kangerlussuarmi unnuinissamut immikkoortinneqartartunit amerlanerungaatsiarput.
- Taamaattumik issiavinnik 305-inik inissaqartitsillutit timmisartuussiguit, taakkunanilu 50-iinnaat Kangerlussuarmut ingerlasuussappata, taava tamanna niuernikkut ingerlatsilluarnerussanngilaq. Taamaattumik nunat tamalaat akornanni mittarfissuartut atuussinnaanissaa takusinnaanngilara.
Apeqqut: Taava inuit sumunnartassappat?
- Ornigassat pingaarnerit tassaalissapput Nuuk Ilulissallu, taakkununngalu nunat tamalaat akornanni timmisartuussisoqartassaaq. Nuummi Ilulissanilu mittarfiit ammareersimalerpata Kangerlussuarmut nunat tamalaat akornanni timmisartuussisarnissamik pilersaaruteqanngilagut, tassani niuernermik ingerlatsinissamut tunngavissaqanngimmat.
- Piffissaq taanna takkuppat imaassinnaavoq kukkusimasunga, kisianni maannakkorpiaq taamaattoqarsinnaanera takusinnaanngilara, Henrik Bjørner Søe oqarpoq.