Kangerlussuaq pillugu suli nalornisoqarpoq
Kangerlussuup Siunissaa pillugu suleqatigiissitaliap nalunaarusiaa tamanit utaqqineqarpoq.
Nalornineq qularnermik inuillu aningaasaleerusunnginnerannik kinguneqarpoq. Aalajangiinnginnerit ineriartornermut ajoqutaapput.
Kangerlussuarmi tamanna maannakkut misigineqarpoq ukiorpassuarnilu misigineqarnikuulluni.
Aviisi Sermitsiaq taama allappoq.
Inuussutissarsiortut pingaartumik takornariaqarnermut aningaasaliinissamut piareersimapput, kisiannili Namminersorlutik Oqartussat Kangerlussuaq qanoq piniarneraat ilisimanissaa pisariaqarpoq.
Nunatsinni ataqatigiinnermut attaveqarfii 2024-mi piareernissaannut suliniutit assigiinngitsut piareersimassappata maannakkut aalajangiisoqassaaq.
- Kangerlussuup Siunissaa pillugu suleqatigiissitaliap suli inaarutaasumik ataatsimoortumik nalunaarusiornikuunnginnera ajortuuvoq, Qeqqata Kommuneani suliniuteqarnermut pisortaq Laust Løgstrup oqarpoq ilisimatitsillunilu borgmesterip Malik Berthelsenip allallu nalunaarusiaq arlaleriaqalutik tuavisaarutigisarnikugaat. Taannami kommunip pilersaarusiorneranut aamma pingaaruteqartorujussuuvoq.
- Oqaatigineqassaarli Illersornissaqarfiup Naalakkersuisullu isumaqatigiinniarnerisa sukkaannerisa sulinermik ajornarnerulersitsisoq, Laust Løgstrup oqarpoq oqarlunilu isumaqatigiissutit taakku sulineq sunnissagaat.
Aviisimi Sermitsiami atuarnerusinnaavutit. Aviisi uani pissarsiariuk: