Kangerlussuaq pillugu kingusissukkut paasisaqarnissaq borgmesterip ernumanartoqartippaa

Illersornissaqarfiup siunissami Kangerlussuarmik atuinissaa pillugu sinaakkutissatut isumaqatigiissut Qeqqata Kommuniani borgmesterip naammagisimaarpaa, kisianni piffissaq pilersaarutaasoq ernumanartoqartippaa, isumaqatigiissutit kingulliit 2024-mi aatsaat piareerneqassammata.

- Kalaallit Nunaata inuinnarnik timmisartuusinermut saniatigut aningaasartuutit nammineq akilertussaagai paasinarsimmat, taava mittarfiup ukiuni tulliuttuni qanoq annertutigisumik atorneqarnissaa pillugu Naalakkersuisut aalajangiisariaqarput, Malik Berthelsen kaammattuivoq.

Illersornissaqarfiup siunissami Kangerlussuarmi mittarfiup atornissaa pillugu ataasinngormat sinaakkutissatut isumaqatigiissuteqartoqarpoq.

Qeqqata Kommuniani ineriartorneq qanimut malinnaaffigineqarpoq, mittarfiup siunissaa kommunimut annertuumik sunniuteqartussaammat, tassami mittarfik ullumikkut amerlasuunik sulisoqartitsivoq.

Borgmesterip Malik Berthelsenip (S) sinaakkutissatut isumaqatigiissut pitsaasuunerarpaa, sakkutuujunngitsunut sakkutuunullu timmisartuussinernut inissaqartitsisoqarniarmat, Illersornissaqarfiullu aamma mittarfiup iluarsartuunnissaa akilertussanngormat, kiisalu mittarfik suli kalaallinit pigineqassammat.

Borgmesterilli isumaqatigiissummi piffissaq pilersaarutaasoq ernumanartoqartippaa:

Naalakkersuisut annertussusissaa aalajangissavaat

- Isumaqatigiissummi piffissaq pilersaarutaasoq ernumanartoqartilaarpara, inaarutaasumik isumaqatigiissutit aatsaat 2024-mi inissinneqassapput. Kisianni tassani susassaqartut isumaqatigiissutaagallartunut ammanerat nuannaarutigilluinnarpara. Kangerlussuarmi innuttaasut aamma inuussutissarsiortut kommunillu ukiuni aggersuni suut atuutissanersut paasisarnissaat pingaaruteqarpoq, Malik Berthelsen, Sermitsiaq.AG-mut allagaqarluni akissuteqarpoq.

Siunissami sakkutuujunngitsunut tunngasuni ingerlatsinerit Kalaallit Nunaata akilertassagai isumaqatigiissummi ersarippoq, tamannalu 2024-p kingorna mittarfimmi qanoq suliaqartoqartiginissaanut alloriarfiuvoq:

- Kalaallit Nunaata inuinnarnik timmisartuusinermut saniatigut aningaasartuutit nammineq akilertussaagai paasinarsimmat, taava mittarfiup ukiuni tulliuttuni qanoq annertutigisumik atorneqarnissaa pillugu Naalakkersuisut aalajangiisariaqarput, Malik Berthelsen kaammattuivoq.

Nuummi Ilulissanilu mittarfissuit atulerpata Air Greenlandip Kangerlussuarmut Dash-8-nik timmisartuussisarnissani maannamut naatsorsuutigalugu nalunaarutiginikuuaa. Niuernikkut ilaasussat naammanngippata, taava kiffartuussinissamut isumaqatigiissuteqartoqartariaqarpoq, Air Greenland taama nalunaaruteqarpoq.

Nunanut allanut timmisartuussisarnissaq suli naatsorsuutigigaat

Kangerlussuup nunatsinni angallattuinnarnut mittarfeqarfinngunnginnissaanilli Qeqqata Kommunia annertuumik kissaateqarpoq, nunanut allanut timmisartuussisoqartarnissaanut Naalakkersuisut aningaasanik nassaarnissaat kissaatigaa:

- Mittarfiup nunanut allanut timmisartuussisarnernut suli atorneqarsinnaanissaa kommunip naatsorsuutigaa. Kangerlussuup siunissaa pillugu kommuni Namminersorlutik Oqartussallu ataatsimoorussamik nalunaarusiamik saqqummiussaqaqqammerput, tassani umiarsuarnik takornariartitseqatigiiffiit suli Kangerlussuarmut timmisartuussisarlutillu ilaasunik taarsiiartortarniarput, Malik Berthelsen allappoq, nangillunilu:

- Nunatta immikkoortua nunap immikkoortui allat assigalugit nunanut allanut suli timmisartuussiffiunissaat kommunip aamma naatsorsuutigaa. Taamaattoqassanngippat eqqumiissaqaaq, tassami nunatsinni takornariartarfiit annersaata tullia pineqarpoq.

Nunanut allanut timmisartuussinissamut periarfissap saniatigut, Sisimiut Kangerlussuullu akornanni aqqusinniornissamut 500-600 millionit koruunit missaannik akeqartussamut Naalakkersuisut aningaasaleeqataanissaat kommunip annertuumik kissaatigaa. Aqqusineq sumiiffimmi takornariartitsinermik ineriartortitsinissamut periarfissanik annertuumik iluaqutsiissasoq, kommuni naliliivoq.

Powered by Labrador CMS