Kangerlussuaq pillugu isumaqatigiittoqareersoq: Kiisami oqartoqarpoq qanoq pineqassanersoq
Kangerlussuaq pillugu isumaqatigiissut Qeqqata Kommunianit Malik Berthelsenimit nuannaarutigineqarpoq. - Isumaqatigiissut Nunatsinnut iluaqutaassaaq, oqarpoq.
- Kiisami! Kiisami oqartoqarpoq Kangerlussuaq qanoq pineqarniarnersoq.
Naalakkersuisut aamma Naalagaaffiup Kangerlussuaq pillugu pingasunngormat isumaqatigiissuteqareersut Qeqqata Kommuniani borgmesteri Malik Berthelsen Sermitsiaq.AG-mut oqarpoq.
Nunamut iluaqutaassaaq
- Soorunami nuannaarutigaara takornariaqarnikkut ineriartortitsiniarnermut peqataalersinnaagatta, iluarisimaarparalu Kangerluussuup nunatsinnut qanoq pingaaruteqartiginera Naalagaaffimmik uppernarsarsarneqarlunilu naqissuserneqarmat. Neriuutigaaralu mittarfissuassat naammassineqarpata, Kangerlussuup unammillertitut isigineqarani suleqatitut isigalugu ullumimiit nunatsinni takornariaqarnikkut ineriartortitsinermut peqataatinneqarnissaa, Malik Berthelsen oqarpoq.
Suleqatigiittoqarnerulernissaa neriuutigaa.
- Aatsammi suleqatigiinnitsigut sumiiffiit assigiinngitsut aningaasarsiornikkut ineriartortissinnaavagut, taamaasiornissarlu nunatsinnut tamarmut iluaqutaaginnassaaq, borgmesteri oqarpoq.
Aningaasaliiniat
Mittarfiup siunissaa qularnaarneqareersoq nunaqarfiup ineriartortinneqarnissaanut maanna politikerit pisussaaffeqalersut isumaqarpoq.
- Taamaattumillu Inatsisartut pissutissaqalerput Kangerlussuarmi nutaamik umiarsualiviliornissamut aningaasaliinissaminnut, taannaavormi timmisartorsuit ilaasuminnik paarlaattarnissaannut periarfissat pitsaanersaat. Taamatuttaaq Naalakkersuisullu suleqatigiissitatta Kangerlussuarmut aqqusinersuup piviusunngortinnissaanut sulinerit piaartumik nangeqqittariqarpagut, aqqusinersuummi piviusunngotinneratigut aningaasaliiumasut utaqqiinnarput, ilaatigut soorlu Aqqutikitsumi sisorartarfissualiorniartut, Qeqqata Kommuniani borgmesteri oqarpoq.