Kangerlussuaq nalunartulik: Kangerlussuup sumut atorneqarnissaa Illersornissaqarfiullu qanoq akiliinissaa ilisimaneqanngilaq

Kangerlussuarmi mittarfik pingaaruteqarpoq 2023-illu kingorna attatiinnarneqassalluni. Illersornissaqarfiulli aningaasat qanoq amerlatigisut mittarfimmut atorniarpai? Kangerlussuullu mittarfissuartut ingerlaannarnissaa mittarfiit nutaat ilaasutigut tunngavissaannut qanoq kinguneqassava? Tunngaviusumik isumaqatigiissuteqarnerup kingornaapeqquterpassuaqarpoq akissutissaqanngitsunik.

Kangerlussuup mittarfiata attatiinnarneqarneratigut aningaasartuutissat Danmarkip Kalaallit Nunaatalu akornanni qanoq avinneqassanersut suli qulaajarneqarsimanngilaq.

Aviisi Sermitsiaq taama allappoq.

Kingullermik illersornissamut ministeri Trine Bramsen nalunaarpoq mittarfik Illersornissaqarfimmut pingaaruteqartoq, suleqatigiissitaliortoqartorlu aningaasaliissutissanik sukumiinerusumik misissuisussamik.

– Kangerlussuup Mittarfia Illersornissaqarfiup timmisartuinut pingaaruteqarpoq, tamaanilu silap pissusia nakkutilliinermik, oqartussaaffeqarnermik aammalu ujarlernermik annaassiniarnermillu ingerlatsinissatsinnut pitsaanerpaamik tunngavissiivoq. Suleqatigiissitaliortoqarpoq aningaasaqarneranik sukumiinerusumik misissuisussamik. Illersornissaqarfiup akisussaaffigiligassani ilisimavai, nalunngilaalu tamanna aningaasartuutissartaqarpoq, tamatumunnga ilanngullugu mittarfiup nutarterneqarneranut ingerlateqqinneqarneranullu, illersornissamut ministeri Trine Bramsen aviisimut Sermitsiamut naatsumik oqaaseqaateqarluni oqarpoq.

Naatsorsuinerit utaqqivaat

Aamma ilisimaneqanngilaq Kangerlussuup 2023-ip kingorna inuinnarnik timmisartuussinermi atuinnarneqarnissaa mittarfiit nutaat ilaasutigut tunngavissaannut qanoq kinguneqassanersoq. Mittarfiliortiternissap akuersissutigineqarnera tunngavigalugu inuiaqatigiit aningaasarsiornerannik naatsorsuinerni Kangerlussuup mittarfiata siunissaa marluinnarnik takorloorneqarsimavoq, heliportinngussasoq imaluunniit 1.500 meterinut naalineqassasoq.

- Taamaasilluni mittarfiup timmisartorsuarnut ilaa­sartaatinut ammatiinnarneqarnera inuiaqatigiit aningaasarsiornerannut qanoq isuma­qassanersoq naatsorsorneqarsimanngilaq. Assersuutigalugu tamanna Ilulissat ilaasunik tunngavissaannut qanoq kinguneqassava, ilaasut ilaat Kangerlussuarmut toqqaannartumik timmisartortassappata, Ilulissanut toqqaannartumik timmisartoratik? Kinguneqaatissatut naatsorsuinerit tamakkua Kalaallit Airportsip sukumiinerusumik misissuleruttorpai, Kalaallit Airportsip siulittaasua Johannus Egholm Hansen aviisimut oqarpoq.

Aviisimi atuarnerusinnaavutit, aviisi uani ataani pisiarisinnaavat:

Powered by Labrador CMS