Kangerlussuaq mittarfittut ingerlaannassaaq
Illersornissaqarfiup Kangerlussuup mittarfianik atuinissaanut tunngaviusumik isumaqatigiissuteqarnermi qulakkeerneqarpoq inuinnaat angalasut Kangerlussuarmut aamma angalasarsinnaanissaat. Mittarfiilli nutaat ammarpata Kangerlussuup qanoq atorneqartiginissaanut tunngatillugu Naalakkersuisut ersarissumik oqaaseqarsinnaanngillat.
Naalakkersuisut illersornissamullu ministeriaqarfiup akornanni tunngaviusumik isumaqatigiissut tassaavoq Illersornissaqarfiup Kangerlussuup mittarfianik atuiinnarnissaanut isumaqatigiissut. Innuttaasut illersornissamut attuumassuteqanngitsut Kangerlussuarmi mittarfimmik tuisinnaanissaat, isumaqatigiinniarnermi Naalakkersuisunit pingaartinneqarsimavoq.
- Tunngaviusumik isumaqatigiissuteqarnermi naqissuserparput Kangerlussuaq inuinnarnit angalasunit aamma atorneqarsinnaanissaa. Tunngaviusumik isumaqatigiissummi naqissuserneqarpoq inuinnaat angalasut takornariallu Kangerlussuarmut siunissami tikittarsinnaanissaat, attaveqaqatigiinnermut naalakkersuisoq, Karl Frederik Danielsen atsioqatigiinnerup kingorna oqarpoq.
Kangerlussuaq timmisartunit atlantikoq qulaallugu timmisartunit suli atorneqassaaq, Illersornissaqarfillu Kangerlussuarmi sumiiffimmiiginnassalluni. Mittarfiullu aserfallassimaqisup iluarsaannissaa, aserfallatsaaliorneqarnissaa ulluinnarnilu ingerlanneqarnera Illersornissaqarfiup akilissavai.
Innuttaasut ataatsimiisinneqangajalerput
Ane Lone Bagger aamma Karl Frederik Danielsen tusagassiortunut ilisimatitsipput Kangerlussuarmi innuttaasut nunaqarfiup siunissaa pillugu ataatsimiisinneqangajalersut.
Tunngaviusumik isumaqatigiissut malillugu Illersornissaqarfiup Kangerlussuarmi mittarfimmik atuinera innuttaasut silaannakkut angallannerannut eqquissanngilaq.
Nunanut allanut tunngasunut naalakkersuisoq erseqqissaavoq illersornissaq pillugu Kalaallit Nunaata Danmarkillu akornanni 1991-imi isumaqatigiissutaat suli atuuttoq.
Siunissamili silaannakkut angallannerup qanoq ikkumaarnissaa suli nalunarallarpoq, nunarpummi ukiut sisamat qaangiuppata pingasunik mittarfissuaqalersimassaaq.
- Kisitsisit kingulliit takutippaat takornariat Ilulissanukartartut amerlanerusut, tikinneqakkajuttunilu tulliusoq tassa Kangerlussuaq. Ilulissani Nuummilu mittarfissuit atulerpata kisitsit allanngussajunnarsipput, tassanngaanniit tikittartut apeqqutaassapput, siunissap tamanna takutikkumaarpaa, Karl Frederik Danielsen oqarpoq.