Kangerlussuaq aliasuppoq - King Kong toquvoq

Nukappiaraalluni Kalaallit Nunaannut pivoq, arni mittarfiup akunnitttarfiani oldfruetut sulisoq ilagalugu.

1966-imiit King Kong nunaqarfimmi nunamut isaaffiusumi sunik tamanik sulialittut atorfeqarsimavoq.

Ukiuni 40-ngajanni Kangerlussuup aqqusernini gummigedimik ingerlatsisarsimavoq, timmisartut, helikopterit, umiarsuit qimussillu usingiartarlugit, 2004-mi soraarninngorluni Danmarkimut nuunnissami tungaanut.

Sapaammi decembarip 13-ianni Lars Henrik Mortensen eqqissilluni anerningerpoq, ullunilu makkunani inuit untritillit arlallit eqqaaniarpaat - ilaatigut Facebookimi.

Kangerlussuaq ataqatigiissippaa

Lars Henrik Mortensenip immikkut taaguutini, King Kong, pissarsiaraa amerikarmiut sakkutooqarfigisimasaanni amerikarmiumit bartenderimit.

Nunami maani, Danmarkimi USA-milu inuppassuit King Kong ilisarisimalersimavaat, ullumikkullu taavaat inuttut malunnaatilittut, inuk puallaarissoq umilik, Kangerlussuarmi nunaqarfimmi sakkutooqarfimmilu ilisarineqarsinnaasumik kingunilik.

King Kong ikinngumminit ilaquttaminillu nersorniarneqarpoq, nunaqarfimmik qaqutigoortumik katitigaasunik innuttalimmik, kulturilimmik inissisimaffilimmillu ataqatigiissitsisutut.

Ilisarisimallugu pitsaasoq

– Angut ikiuiumatoorujussuuvoq. Kangerlussuarmut tikerlaatut ilisarisimalerlugu nalissaqanngitsoq. Kangerlussuaq pillugu oqaluttuassarpassuaqarpoq, kingoraartissamillu atortussanilluunniit allanik amigaateqaraanni King Kong tamatigut ikiuussinnaasarpoq, lisarisimasaata ilaat Facebookimi allappoq, taannalu oqaluttuarpoq ullut ilaanni King Kongip bulldozerimik attartorsimasoq Sermersuarmi angalaarniarluni.

Ikinngutitut qanigisaata allap Lars Henrik Mortensen eqqaaniarpaa inuk qiimasutut, Kangerlussuarmi sallerulanertut siuariartortitsisutut.

– King Kong ilakkumiartuusimavoq. Inuk nuannaartoq pitsaasorlu. Allanik ajortumik oqaatiginnittoq tusarsimanngisaannarpara. Inuk allaanerusimavoq. Pitsaasumik allaanerussutilik. Bamse nuannerluinnartoq kikkut tamarmik asasaat.

Sorpassuarnik ilisimasalik

King Kongili inutsialassuginnanngilaq, pingajuat allappoq.

– Eqqaamallaqqinnerujussuarmigut teknikkikkut pisortarpassuit annattarsimavai. Suut sumilu assanneqarsimanersut eqqaamaannarnagu aamma eqqaamasarsimavaa kikkunnit suliarineqarsimanersoq, ulloq taanna sila qanoq ittuusimanersoq aammalu kiap gummiged ingerlassimaneraa.

Kangerlussuarmi aamma ajunngitsuliornermut ingerlatsisoqarluartarsimavoq, tamatumani sakkutooqarfimmi sulisut aningaasarpassuarnik tunissuteqartarlutik.

Arfininngorpat ilisaassaaq

Tamatumani King Kong ukiut tamaasa ukiukkut festernermit sinneqartoorutinik tunniussisuusarpoq, amerlanertigut 100.000 koruunit sinnerlugit Thailandimi børnehjemminut tunniunneqartarlutik.

Lars Henrik Mortensen aqagu, arfininngornermi, Nykøbing Falsterimi ilisaassaaq.

Allaaserisaq una allanneqarpoq ikinngutai attorneqartullu Facebook-gruppimi ´In Memory of King Kong´ ikiortigalugit.