Kangerluk: Hans Egedep tikinneranit ukiut 300-nngornerisa malunnartinneqarnissaa taamaatiinnarneqartoq

Nunaqarfimmi Kangerlummi innuttaasut aqqaneq-marluusut ilaat suli akiuussutissalerneqarsimanngimmata, Qeqertarsuarmi Katersugaasivik aalajangersimavoq, Hans Egedep ukiut 300-t matuma siornatigut tikissimanerata malunnartinneqarnissaa taamaatiinnarneqassasoq.

Hans Egedep tikinneranit ukiut 300-nngornerat pillugu Kangerlummi malunnartitsiniarneq taamaatiinnarneqarsimavoq. Qeqertarsuup Katesugaasivia Diskofjorderimilu innuttaasut komitéat pisussamik aaqqissuussisimagaluarput.

- Nunaqarfimmi innuttaasut ilaat suli akiuussutissalertissimanngimmata, nunaqarfimmi tuniluuttoqalersinnaanera pinngitsoortinniarparput, Qeqertarsuup Katersugaasivianit ilisimatitsissutigineqarpoq.

Aaqqissuussami arsamik unammisitsisoqartussaagaluarpoq, thulekulturimi kakiortittarsimanerit assigannik kiinnakkut titartaasoqartussaagaluarpoq pisuussutinillu ujaasitsisoqartussaagaluarluni. Aaqqissuussat arfininngorpat juulip arfineq-aappaanni ingerlanneqartussaagaluarput.

Ukiut tamaasa aaqqissuussisoqartarniartoq

Nunaqarfik Kangerluk 2019-imi ilungersunarluinnartumik inissisimalersimavoq. Innuttaasut allanut noorarnerisigut Kangerluup atuutiinnarnissaanut tunngaviit aarlerinarsisimapput, 2019-imimi innuttaasut arfineq-marluinnanngorsimagamik. Ullumikkut innuttaasut aqqaniliupput .

Mathias Willep nunaqarfiup ingerlaannarnissaa siunertaralugu Diskofjordimi innuttaasut komitéat pilersissimavaa.

- Siornatigut assigiinngitsunik aaqqissuussisarsimavugut, inuit avataani tikillutik Kangerlummut tikeraartarnissaat siunertaralugu. Pilersaarutigaarpullu, ukiut tamaasa assigiinngitsunik aaqqissuussisalerniarluta, Matsis Wille Sermitsiaq.AG-mut oqarpoq.

Qeqertarsuup Katersugaasiviata ilisimatitsissutigaa, Qeqertarsuarmi arfininngorpat aggustip arfineq-aappaani aaqqissuussisoqarniartoq.

Powered by Labrador CMS