Kangaatsiaq nutaamik atuarfittaartussanngorpoq

Atuarfiup sanaartorneqarnera maajimi aallartissaaq, naammassillugulu tunniunneqarnissaa 2022-mi pissasoq naatsorsuutigineqarluni.

Kangaatsiami innuttaasut, pingaartumillu atuartut, nutaamik atuarfittaarnissaminnut qilanaarsinnaanngorput.

Sanaartorneq maajimi aallartissaaq, atuarfillu piareerlugu Kommune Qeqertamut ukiut marluk qaangiuppata tunniunneqassasoq naatsorsuutigineqarluni.

- Ukiorpassuarni innuttaasut nutaamik atuarfittaarnissamik kissaataat piviusunngulerpoq, qularnanngilarlu atuarfittaarneq, angusat qaffariarnissaannut sulinermi pingaaruteqassasoq,
Kommune Qeqertalimmi borgmesteri, Ane Hansen tusagassiutinut nalunaaruteqarluni oqarpoq.

- Nuannaarutigeqaarput kiisami anguniagaq anguneqaraluttuarmat. Meeqqat, ilinniartitsisut angajoqqaallumi qutsateqaagut, nutaarsuarmik atuarfeqalissammata. Sanaartorneq qularnanngitsumik Kangaatsiami suliffissaqartitsinikkut annertuumik iluaqutaassammat aamma nuannaarutigeqaarput, taama oqarpoq ataatsimiititaliami Inoqarfimmi siulittaasoq, Hans Aronsen (IA).

Tamakkiisumik aningaasalersuipput

Sanaartornissaq kommunip nammineerluni aningaasalerpaa. Borgmesterilu naapertorlugu kommunip oqaluttuarisaanerani sanaartukkani annertunerpaavoq.

Kommune Qeqertalik kommunini siullersaalluni atuarfimmik sanaartortitsilluni tamakkiisumik aningaasaliisuuvoq. Inatsisartut aningaasaliinissamik pilersaarutitik 2017-imi unitsippaat.

- Kangaatsiami atuarfittaalernerput nuannaarutigeqaarput,
qularnanngilarlu meeqqat atuarfianni angusat qaffariarnissaanut,Ane Hansen oqarpoq.

KJ Greenland A/S atuarfittaassammik sanaartortuussaaq.

Atuarfissaq nutaaliaasoq meeqqat atuarfianni inatsimmi piumasaqaatit naapertorlugit titartarneqarsimavoq, atuisussanut avatangiisit qitiutillugit, Kommune Qeqertalik tusagassiutinut nalunaaruteqarluni allappoq.

Powered by Labrador CMS