Kangaatsiaq atuarfia atserneqarpoq: Illoqarfimmut qaamanermik kialaarnermillu tunisissaaq
Kangaatsiap atuarfittaava ukiup affaani maanna atoreerpoq. Atissaanik unammisitsinermi illoqarfiup borgmestererisimasaa ajugaatinneqarpoq, oqariartuut eqqorluinnartoq tunngavigalugu siunnersuuteqarami.
Kommune Qeqertalup Kangaatsiap atuarfiata atissaa, innuttaasut siunnersuuteqarneratigut aalajangerpaa.
Atuarfik 2022-imi atuartitsineq aallartimmat atulersoq maanna Kangaatsiap Atuarfia Iparartarfimmik ateqalerpoq. Atuarfiup siulersuisui siunnersuuteqartitsisoqareersorlu taama aalajangerput.
Kangaatsiami borgmesteriusimasoq, Paulus Steenholdtip siunnersuutaa toqqarneqartoq, Kommune Qeqertalik tusagassiorfinnut nalunaaruteqarpoq.
- Tunngavilersuutigineqartut tulluulluinnartut ilaatigut iparaq qaammaqqusiimmat
nunaqqatigiinnut kissalaamillu tunniussisuusarsimalluni; tamanna atuartut siunissaannut
tulluuttutut nalilerlugu siunnersuuteqartunit arlalinnit tunngavilersuutigineqarsimasoq
takuneqarsinnaavoq, atuarfiup siulersuisui allapput.
Qanilaarneq, qaamaneq kialaarnerlu inissaminiipput
Oqaluttuatoqqat naapertorlugit Kangaatsiap atuarfiata maanna inissisimaffiani ipartartoqartarsimavoq. Kommunip borgmesteriata Ane Hansenip (IA) tamanna ateqaasiunneqarnera inissimaniittutut oqaatigaa.
Siunnersuuteqartup Paulus Steenholdtip erseqqissarpaa qanilaarneq qaamanerlu meeqqat siunissaanut ajunngitsumik kinguneqartartoq.
- Meeqqat qaamanermik kissalaamillu pinermikkut pitsaasumik angusaqarsinnaanerannut assersuullugu, Paulus Steenholdt tunngavilersuivoq.