Kangaatsiap eqqaani ajunaarnersuartut ittumik pisoqariaannaasoq
Kangaatsiami Kangaatsiallu nunaqarfiini sineriammut qanittumi aalisartorpassuit saarulliit ikilerarujussuarsimanerisa kingunerannik isertitaat appariarujussuarsimapput. Tamatumunnga peqatigitillugu aalisakkanik tunisaqartoqarsimanngimmat aalisakkerivinni sulisut angerlartiinnarneqarsimapput. Ilaqutariippassuit taamaalillutik aningaasakilliortinneqarput
Kangaatsiap eqqaani aalisartut siorna nalunaarutigaat, saarulliit ukiup siulianut sanilliullugu ikinnerulersimasut. Sineriammut qanittumi aalisartut neriuutigisimagaluaraat ukioq manna saarulleqarluarnerussasoq, aalisarneq pitsaanerulersussatut isikkoqarpasinngilaq.
Aviisi Sermitsiaq taamatut allappoq.
Saarullinniarneq ima ajortigaaq, allaat aalisartorpassuit siunissamut ernumassuteqalersimallutik. Aalisakkerivinnilu aalisakkanik suliassaaleqineq pissutigalugu sulisorpassuit angerlartiinnarneqarsimallutik. Tamanna ilaqutariippassuit aningaasaqarnerannut kommunillu aningaasaqarneranut eqquivoq, naggataatigullu Nunatta Karsianut eqquisussaalluni.
Isertitat appariarujussuartut
68-inik ukiulik Klaus Frederiksen Niaqornaarsummeersoq, aalisartuullunilu piniartuusoq oqarpoq, saarulliit ikileriarujussuarsimanerat siornali malunnarsereersimasoq. Naatsorsuutigisimanngikkaluarpaali aalisarnerup ukioq manna taamak ajortiginissaa.
- Saarulliit ikinnerulersimanerannut suna pissutaanersoq naluara. Kangerlunni suli saarulleqaraluarpoq, amerlavallaanngitsunilli. Saarullinniarnermit isertitavut pinngitsoorsinnaanngilavut. Taamaammat taamatut inissisimasoqarnera ajunaarnersuartut taaneqarsinnaavoq, taanna aalisarnerlunnermut silap pissusaata allanngoriartornera pissutaanerpaasoq isumaqartoq oqarpoq.