Kangaatsiami umiatsiaararsortut ajornartorsiortut
Kangaatsiami aalisarnermik piniarnermillu inuussutissarsiuteqarneq ilungersunartumik inissisimavoq, tamannalu umiatsiaararsortunut ilaqutaannullu eqquinerluppoq. Aningaasanillu ikiorsiisoqartariaqartoq kiisalu inuussutissarsiornerlu periarfissanik nutaanik qulaajaasoqartariaqartoq, aalisartut piniartullu peqatigiiffiat isumaqarpoq.
Ukiut kingulliit marluk ingerlaneranni Kangaatsiap eqqaani saarulliit tammakarsimapput, Royal Greenlandillu aalisakkanut suliffissuaataanut qalerallit tunisaagaluartut, qaleralinniarneq annikitsuinnarmik ingerlavoq. Naallu puisit pisarineqartaraluartut puisit amiinut tunitsiveqanngilaq.
Aviisi Sermitsiaq taama allappoq.
Aammali silaannaap allanngoriartornerata kingunerisaanik Kangaatsiap eqqaa kangerluillu qangatut sikuussaarput, tamatumalu kingerisaanik ukiuunerani piniarneq ajornarneruliinnarani, qimusseq piniutit atugaajunnaarluinnalerpoq. Inuussutissarsiornikkullu atukkat taamaannerisa kingunerisaanik umiatsiaararsortut ilaqutaasaalu inuuniarnikkut atugaat oqimaannerulerput, pisortaniillu aningaasatigut ikiorsiisoqarnissaa avaqqunneqarsinnaajunnaartoq, Kangaatsiami Aalisartut Piniartullu Peqatigiiffiat, KAPP, isumaqarpoq.
Inuuniarnikkut atukkat ilungersunartut
- Ukiut kingulliit marluk umiatsiaararsortut inuussutissarsiornerat ilungersunartorujussuuvoq, allaat inuussutisssarsiutip siunissami attatiinnarnissaa aarlerinarsilluni.
- Naak aalisarnikkut ingerlalluarfitsinni inuuniarneq oqinnerusaraluartoq, massakkut ajorluinnartumiippugut, KAPP-imi siulersuisunut ilaasortaq Ole Siegstad oqarpoq.
Aviisimi Sermitsiami atuarnerusinnaavutit. Aviisi uani pissarsiariuk:
