Kangaatsiami sulisut pingasut suli suliunnaarsinneqaqqangallartut
Kangaatsiami inunnik isumaginninnerup iluani sulisut pingasut sapaatit akunneri marluk matuma siorna suliunnaarsinneqarallartut, suli suliartunngillat.
Isumaginninnerup iluani sulianik misissuisoqareersorlu sulisut suliunnaarsinneqarallarput. Kommune Qeqertalik tusagassiutinut nalunaaruteqarluni ilisimatitsivoq sulisut pingasut sapaatit akunnerni marlunni suliunnaarsinneqarallartut.
Maanna sapaatit akunneri marluk qaangiussimalerput, sulisulli suli suliartorsimanngillat.
- Suliami suli inerniliisoqarsimannginnera tamatumunnga pissutaavoq, Dina Olsen, Atorfillit Kattuffianni siulittaasoq, Sermitsiaq.AG-mut ilisimatitsivoq.
Dina Olsen ilisimatitsivoq kattuffiup suliamut tunngasut tigusimagai. Sulisut pineqartut tusarniarfigineqarsimapput, suliamili suli inerniliisoqarsimanani.
Nalunaarutinut qisuariartoqartanngitsoq
Kommune Qeqertalik Kangaatsiami meeqqat inuusuttullu pillugit sulianik misissuereerlutik paasivaat meeqqat pillugit nalunaartoqarsimatillugu suliat qisuariarfigineqarneq ajortut. Meeqqat inuusuttullu pillugit inatsit siorna atuutilersoq malillugu inunnik isumaginnittoqarfimmut meeqqat nalunaarutigineqartillugit, isumaginnittoqarfik akunnerit 24-it ingerlaneranni suliamik aallartitsisartussaapput.
- Nuanninngilaq, soorunami meeqqat pineqaraangata tamatigut nuannerneq ajorpoq. Sulisut ulluni 14-ini suliunnaarsikkallassallugit aalajangerpugut, misissuinermi sunniinnginniassammata, Ane Hansen nassuiaavoq (IA), Sermitsiaq.AG-mut januaarip 28-ani oqarpoq.
Kommune Qeqertalimmit naatsorsuutigineqarpoq sulianik misissuineq sapaatit akunnerni marlunni ingerlanneqassasoq, kingornalu sulisut pingasut suliartoqqissinnaassasut. Suliunnaarsitsigallarnerulli sivitsorneqarnissaa pisariaqarsimavoq.
Aasianniit sulisut marluk Qeqertarsuarmiillu sulisut marluk Kangaatsiamut suliartortinneqareerput. Taakku Kangaatsiami ulluinnarni sullissinermik ingerlatsissapput, taassumallu saniatigut misissuinermik nangitsissallutik.
Kommune Qeqertalimmi borgmesteri Ane Hansen (IA) pisumi Sermitsiaq.AG-miit oqaaseqartissinnaasimanngilarput.