Kangaatsiami imissaaleqisoqaleqqippoq
Umiarsuarmik tunitsivimmik umiarsualiisoqarnissaa Kangaatsiarmiunit piumasarineqarpoq
Kangaatsiami imeqarfik imaarutilermat Royal Greenlandip illoqarfimmi tunitsivimmut tuniseqqusinngilaq.
- Taamaattumik Kangaatsiap eqqaanut umiarsuarmik tunitsivimmik umiarsualiisoqarnissaa kissaatigaarput, Kangaatsiami KNAPP, qatserisarfik, Royal Greenland aamma Nukissiorfiit allapput.
Aarleriarluinnartoq
Taseq imeqarfiusoq millisimasoq nalunaarutigaat.
- Taseq imeqarfik ukioq kingullermit annersuumit paqqeriarsimasoq, ataatsimeeqatigiit taama inissisimalerneq inuussutissarsiornikkut aarlerinarluinnartutut tiguaat, allapput.
Ajornartoornermi illoqarfimmi imermik pilersuinermik suliaqarneq manna ingerlalluarpoq, Nukissiorfiit ilisimatitsivoq.
- Suliamik tamatuminnga sukumiisumik anguniarparput martsip ulluisa 23-anni nalinginnaasumik ingerlatsisoqaqqilernissaa, nalunaarutigineqarpoq.
Imeqarpallaarunnaartoq
Taamaattoq Nukissiorfiilli Kangaatsiami fabrikki noqqaaffigaat ingerlatatik suli uninngatikkallassagaat assartuinermut suliassartaata aaqqiivigineqarnissaata naammassinissaata tungaanut.
- Nalinginnaasumik ingerlatseqqittoqalerpat Nukissiorfiit sakkortunerpaamik noqqaassutiginiarpaat martsip ulluisa 23-ata kingornatigut isumatusaarluaqqissarluni imermik atuisoqartarnissaa. Fabriki taamaattumik iliuuseqartitsisariaqarpoq imermik killilimmik atuisoqartarnissaanut naatsorsuutigineqartumik juunimi aputip aattulernissaata tungaanut, tassa ajornartoornermi pilersuinerup matuma ingerlannissaanut atatillugu aningaasartuuterpassuaqarnarmat, nalunaarutigineqarpoq.
Maannakkut pisoq patsiseqarpoq aasaq panernarsimasorujussuummat, tamatuma kinguneranik Nukissiorfiit Kangaatsiami tatsimi ukiuunerani imermik katersiviani imeqarpallaarunnaarluni.