Kangaatsiami aalisarneq unittooqqasoq
Immap sikuniaataarnera saarulleqannginnerujussuarlu pissutaallutik Kangaatsiami nunaqarfiinilu aalisarneq unittooqqavoq.
Isumaqarnarsinnaagaluarpoq Kangaatsiap eqqaata iluamik sikussaarnerata kinguneranik sinerissap qanittuani aalisarneq ingerlalluarnerulersimassasoq. Killormorluinnarli silap allanngornerujussuata kingunerisaanik aalisarnikkut periarfissat ajornerulerput.
Aviisi Sermitsiaq taama allappoq.
Kangaatsiami nunaqarfiinilu suli sikunngilaq, sumiiffimmilu aalisarneq unittooqqalluinnarpoq.
Aalisarneq uniaartoq
Ole Siegstad, Kangaatsiami aalisartut piniartullu peqatigiiffianni siulittaasoq, oqarpoq sumiiffimmi ukiup taamaalinerani aalisarneq inuuniutigineqarsinnaanngitsoq. Sikusarallarmat sikukkut aalisarneq ukiup taamaalinerani aallartinneqartarsimagaluarpoq.
Aalisarnerli unitsiaarneqaraluartoq, taamaattoq suli isumalluarpoq.
- Imaassinnaavoq saarulliit upernaamut takkuteqqittut. Tamannali pissanngippat, imaassinnaavoq sinerissap qanittuani saarulliit tammakariartulersimasut, taanna naliliivoq.
Kangaatsiami eqqaanilu aalisarnerup unittoorsimanera pillugu aviisimi Sermitsiami atuarnerusinnaavutit. Aviisi uani pissarsiariuk: