"Kampen om Grønland" TV-kkut takutinneqassaaq
Piviusulersaarusiaq, "Kampen om Grønland", kalaallit inuusuttut namminiilivinnissaq pillugu isumaliutersuutaanik takutitsisoq, TV-kkut DR1-imi 22. juni takutinneqaqqaartussanngorpoq.
Kampen om Grønland, kalaallit inuusuttut nunatsinni allanngortoqarnissaanik kissaateqartut pillugit piviusulersaarusiaq, CPH:DOX-imi siullermik takutinneqaqqaarpoq. Piviusulersaarusiami inuusuttut inuiaqatigiinni unammilligassat siunissarlu pillugit isumaat sammineqarput.
Paninnguaq Heilmann, Josef Tarrak-Petrussen, Tillie Martinussen aamma Kaaleeraq Andersen inuiaqatigiit pillugit suliniuteqartutut piviusulersaarummi oqaloqatigineqarput.
Filmi CPH:DOX-imi siullersaalluni takutinneqarpoq. Ilitsersuisulli Kenneth Sorentop neriuutigisimagaluarpaa filmi politikkikkut eqqartorneqarnerusimanissaa, Kampen om Grønlandimi suliaqartut tusagassiorfinnut taama nalunaaruteqarput:
- Isumaqarpunga Kalaallit Nunaat pillugu politikkimik suliaqartut tamarmik piviusulersaarut takusariaqaraat. Kalaallit Nunaat nunarsuarmi inissisimanini pissutigalugu nunat tamalaat akornanni soqutigineqarluarpoq. Kalaallit allanngortoqarnissaanik kissaateqarnerat piffissap ingerlanerani annikinnerulernavianngilaq. Kalaallit Nunaanni namminersulernissaq kinaassuserlu pillugit isummat assigiinngingaartut filmimi ersersinniarsimavakka, filmimi ilitsersuisoq Kenneth Sorento oqarpoq.
Kultoorikkut assigiinnginnerujussuaq
Piviusulersaarummi apeqquterpassuit apeqqutigineqarput akineqarlutillu. Kalaallit unammilligassaat pillugit kinaassuseq qanoq pingaartinneqartiginersoq, aammalu oqaluttuarisaaneq qanoq pingaaruteqartiginersoq.
Piviusulersaarutip suliarinerani ilitsersuisup tupaallaatigaa kalaallit qallunaallu akornanni kultoorikkut assigiinnginnerujussuaq.
- Kalaallit qallunaanit minnerusutut imminnut isigisarnerata malunnarnera ilimagisimanngikkaluarpara. Nunasiaataanerup kalaallinut suli maannamut kingunerluuteqarujussuarsimanera aamma aatsaat tusarpara, oqarpoq nangillunilu:
- Kampen om Grønland namminersulivinnissamut suliniutit nunarsuup ilaani iluatsittarnerani saqqummerpoq. Filimili uanga tunginnit qanoq iliornikkut peqataatitsinissamut tunngassuteqarluinnarpoq. Neriuppunga filmi tunngavigalugu Kalaallit Nunaat Danmarkillu akornanni oqaloqatigiinneq tamanik attuisoq aallartissasoq, aammalu Kalaallit Nunaata namminiilivinnissaannut naalagaaffeqatigiinginnarnissamulluunniit oqariartuuteqartut akornanni oqaloqatigiinneq aallartissasoq.
Filmi TV-kkut DR1-imi 22. juni takuteqqaarneqassaaq. DR-ikkullu 22. juni aallarnerfigalugu nittartakkakkut isiginnaarneqarsinnaalluni. Filmi tv-kkut takutinneqareerpat Kalaallit Illutaanni 22.juni nalunaaqutaq 22.20 oqallittoqassaaq.