Kampen om Grønland nersornaaserneqarnissamut innersuunneqartoq
Piviusulersaarut ”Kampen om Grønland” Ukiumi Piviusulersaarutitut Robertimik nersornaaserneqartussatut innersuunneqarsimavoq. Ajugaasoq 2021-mi februaarip arfernani nalunaarutigineqassaaq.
Filmi piviusulersaarut ”Kampen om Grønland” danskit filmilianut tv-kkullu aallakaatitassianut nersornaasiuttagaannik Robertimik nersornaaserneqartussatut innersuunneqarsimavoq, piviusulersaarummi kalaallit inuusuttut Kalaallit Nunaanni ullumikkut pissutsit, unammilligassat namminersulivinniarnerlu pillugit isummaninnik aniatitsinerat pineqarpoq.
Robert pillugu nersornaasiisartut nittartagaanni tamanna takuneqarsinnaavoq, nittartakkami nersornaaserneqartussatut innersuunneqartut tamarmik saqqummiunneqarput.
Kenneth Sorentop, piviusulersaarummik suliaqarnermi ilitsersuisuusup filmiliornermi peqataasut sulilluarsimanerannut qujassuteqarfigai:
- Og stor tak til hele holdet bag Kampen om Grønlandip suliarinerani peqataasimasut tamaasa suliaqarluarsimanerannut qujaffigaakka, suliaqarluarsimanerisa ilaatigut Ukiumi piviusulersaarutit takisuut nersornaasigassatut innersuunneqarsimasunut tallimaasunut ilaanerput nassataraa, taanna allappoq.
Nuummi takuteqqaarneqartoq
Piviusulersaarut Nuummi martsip qaammataani 2020-mi takuteqqaarneqartussatut pilersaarutigineqarsimagaluarpoq. Tamannali pinngitsoortinneqarpoq coronavirusip tunillaassuunnera pissutigalugu. Nuuk International Filmfestivalimi septemberimi ingerlanneqartumi, taamaasilluni aatsaat takutinneqarpoq.
Martsimili filmi nunat tamat piviusulersaarutinik takutitsineranni, CH:DOX-imi ammaanersiorluni takutinneqarsimavoq.
Kampen om Grønlandimi kalaallit inuusuttut inuunerat siunissamullu takorluugaat oqaluttuarineqarput.
Filmimi peqataapput rappertartoq Josef Tarrak-Petrussen, taamanikkut taassuma nuliarisaa Paninnguaq Heilmann, inuiaqatigiinni oqallissaarisartoq Kaaleeraq Andersen aamma Inatsisartuni ilaasortaq Tillie Martinussen.
Imminortarnermi, inuttut ajornartorsiuteqarnermi aamma appasissumik ilinniagaqarsimanermi unammilligassat filmimi qitiutinneqarput, filmilionermilu peqataasut kinaassuseq pillugu isummaminnik aamma Kalaallit Nunaannut pitsaanerpaamik kissaassinertik pillugu saqqummiussipput.
Ajugaasoq 2021-mi februaarip arfernani nalunaarutigineqassaaq.
Piviusulersaarutit uku nersornaaserneqartussatut innersuunneqarsimapput:
Muldvarpen – undercover i Nordkorea
I love you I miss you I hope I see you before I die
Undertrykkelsens sang
7 years of Lukas Graham
Kampen om Grønland