Kammeradvokatimut akiligassaq takkussimavoq
Danmarkimi kammeradvokatip, Eqqartuussissuserisup Poul Schmithip Kim Kielsen nipisattassiissutit pillugit suliami attuumassuteqarpallaarsimanersoq pillugu misissuisimanera 181.798 koruuninik akeqarsimavoq
Eqqartuussissuserisup Poul Schmithip, Naalakkersuisut Siulittaasuat Kim Kielsen nipisattassiissutinik qaffaasoqarnerani aalajangeeqataasimanermini ajornartorsiuteqarnersoq pillugu nalilersuisimanera 180.000 koruunit missaannik akeqarsimavoq.
Kielsenip angallatini ikinngumminut attartortissimavaa, ikinngutaa siulittaasup angallataa atorlugu nipisannik 200.000 koruunit missaannik nalilimmik tunisaqarsimavoq, tassa akiligassap annertoqqatingajaannik.
Tamanna allagaatini Sermitsiaq.AG-p takusimasaani atuarneqarsinnaavoq. Aaqqissuisoqarfiup suliakkiissut eqqartuussissuserisumut misissuititsinermut tunngaviusoq siusinnerusukkut pissarsiariniarsimagaluarpaa. Eqqartuussissuserisumut suliakkiissut pillugu allakkatigut isumaqatigiissutaasimasoq pissarsiarineqarsinnaasimanngilaq, Naalakkersuisut Siulittaasuata Naalakkersuisoqarfin inatsiseqarnermut immikkoortortaqarfimmi pisortaq naapertorlugu, isumaqatigiissut allagaatinik takunnissinnaatitaanermut ilaanngimmat.
Naalakkersuisut ilisimatittariaqarsimagaluarai
Naalakkersuisoqarfik akissuteqarnermini imatut ilisimatitsivoq:
- Kammeradvokatimut naliliiffigeqquneqarsimavoq, Naalakkersuisut siorna pisassiissutaasimasunik ukioq mannamut nuussiniarlutik 2020-mi maajip aqqaneq-aappaanni aalajangiimmata Naalakkersuisut Siulittaasuat suliamut attuumassuteqarsimannginnersoq/attuumassuteqarpallaarsimanersoq.
Suliakkiissut tamanna Nunatta Karsianut 181.798 koruuninik naleqarsimavoq.
Eqqartuussissuserisup inerniliussimavaa, paasissutissat pissarsiarisimasani naapertorlugit Kielsen attuumassuteqarpallaarsimanngitsoq, pissutsilli attuumassuteqarpallaarsinnaanermut tunngaviusinnaasut pillugit Naalakkersuisunut ilisimatitsissutigisariaqarsimagaluarai.
Pineqartoq tassaavoq, Kielsenip pisassiissutit qaffanneqareersut angallatiminik ikinngumminut nipisannik tunisaqartartumut attartortitsisimanera.
Taava massakkut susoqassava?
Tamatuma kingorna Inatsisartut Kukkunersiuinermut Ataatsimiitialiaata pisimasoq misissorsimavaa. Suliamut Kielsenip attuumassuteqarsinnaanera pillugu suliaqarnermi aamma Inatsisartut ataatsimiititaliata suliaqarnerani Naalakkersuisut paasissutissanik tunniussiumasimannginnerat sakkortuumik isornartorsiorneqarpoq.
Maanna apeqqutaalersoq tassaavoq, Kukkunersiuinermut Ataatsimiititaliap nassuiaataa Inatsisartuni qaqugu suliarineqassanersoq. Inatsisartummi tassaapput suliaq tamarmiusoq kinguneqartinneqassanersoq pillugu isummertussat.