Kalistat Lund: Erngup nukinganik nukissiorfeqarneq imminut pilersornissamik anguniagaqarnermut ilaavoq
Naalakkersuisut nunami erngup nukinganik nukissiuutinik annertusaanissamik ukkataqarnissaat qularutigineqassanngilaq. Naalakkersuisoq Kalistat Lund (IA) taamatut oqarpoq.
Nunalerinermut, Pilersornermut, Nukissiuuteqarnermut Avatangiisinullu Naalakkersuisunngorlaap Kalistat Lundip erseqqissaatigaa, erngup nukinganik nukissiuuteqaarfiliornissamik suliniutigineqartut naalakkersuisooqatigiinngortunit pingaartinneqarluartut.
- Utoqqarmiut Kangerluarsunnguanni erngup nukinganik nukissiorfiup allilerneqarnissaata uanga Naalakkersuisoqatimmalu pingaartitarilluinnarparput. Taamatuttaaq Qasigiannguit Aasiaallu eqqaanni erngup nukinganik nukissiorfissamik nutaamik pilersitsinissaq, naalakkersuisooqatigiit isumaqatigiissutaanni allassimasutut.
Utoqqarmiut Kangerluarsunnguaanni nukissiorfik Nuummut pilersuisoq innuttaasut amerliartornerannut malinnaasinnaajunnaalerpoq.
Taseq naammakkunnaalersoq
Nukissiorfinnit naliliisimanerup takutippaa, taseq ullumikkut atorneqartartoq 2024-mi imaarutingajattussaasoq, tassa imeq siallerneranit tatsimut kuuttartoq maqinneqarsinnaajunnaassaaq.
Nukissiorfik allilerneqanngippat, illoqarfiit pingaarnersaat innaallagissamik kiassarnermillu pilersorniarlugu uulia atorneqartariaqassaaq, tamannalu akisusinnaavoq. Utoqqarmiulli Kangerluarsunnguanni nukissiorfiup allilerneqarnissaa pissutissaqavissumik kinguartinneqarsimavoq, Kalistat Lund erseqqissaavoq.
- Nunatta aningaasaqarnera siorna COVID-19-imit eqqugaarujussuarpoq. Aningaasaqarnerup qanoq inissisimanera paasilluaqqaartinnagu milliardilikkaanik aningaasaliissuteqarnissaq akisussaassuseqannginnerussaaq, taanna oqarpoq.
Aningaasaqarneq misissorneqartoq
Aningaasaqarnermut Naalakkersuisunngorlaap Asii Chemnitz Narupip nunap aningaasaqarnera misissorlugu aallartereerpaa, tamatumalu kingorna naalakkersuisooqatigiit pilersaarutaasut suleqatigiinnissamik isumaqatigiissummut ilaasut tigussaasumik suliaralugit aallartissinnaanngussavaaat.
Isumaqatigiissummi allassimavoq, Qasigiannguit eqqaani erngup nukinganik nukissiorfiliortoqassasoq aamma Nuup eqqaani erngup nukinganik nukissiorfik allilerneqassasoq.
- Erngup nukinganik nukissiorfiliornissamut aningaasaliissutit, Naalakkersuisut mingutsitsinnginnerusumik nukimmik pilersuinerunissamik immitsinnullu pilersornerunissamik anguniagaannut ilaapput, Kalistat Lund oqarpoq.